Pisortanngunngitsiarnermi pikkorissarnerup siunertarivaa misilittakkat aallaavigalugit peqataasunut ersarissassallugu Kalaallit Nunaanni Namminersorlutik Oqartussani pisortat ilaattut sulilerniaraanni nammineq piginnaasat aamma soqutigisat pigereeraanni ilumut naammannersoq. Taamaasillutit paasisaqarfiginerusinnaavat aqutsisuuneq aamma allat aqqutigalugit iluatsilluartumik pilersitsineq qanoq paasisariaqarnersoq. Tamatumani imminut ilisarisimalluarnissaq allanillu suleqateqarnermi nammineq qisuariaatigineqarsinnaasunik ilisimaarinnilluarnissaq pisariaqarpoq.

Taaguut aqutsineq suliarineqassaaq, aqutsisuuneq iluatsitsinerlu qanoq paasisariaqarpa aamma aqutsisoorusunnermut atatillugu nammineq piumassuserisaq misissorneqassaaq. Aamma pisortani aqutsisup tigusisinnaasariaqarneranut atatillugu nammineq pikkorissutsit piginnaasallu isummersorfigineqassapput.

Pikkorissarnerup imai:

• Pisortatut sulineq sunaava?
• Aqutsisup suliassai.
• Pisortatut sulinermi akunnattoorfiusinnaasut ajutoorfiusinnaasullu.
• Siulersuisinnaaneq aamma inuttut inerikkiartorneq
• Piumasat pisussatullu ilimagisat
• Suliassanik nammineq tulleriiaarisinnaaneq

Anguniagaq: Peqataasup saqqummiinerit, sungiusarnerit aamma nammineq qisuariaateqartarnerit aqqutigalugit immikkut atorfeqarnermut sanilliullugu pisortanngorniarnerup kingunissai paasissagai. Pisortanngunngitsiarneq piffimmi nammineq inissisimaffiup, nammineq inuttut kiisalu inuttut atugarissaarnerup ulluinnarnilu suliat kingunerisinnaasaasa pingaaruteqassusaat pillugit paasisaqarnissamut periarfissiissaaq.

Ilinniartitsinerup ilusissaa:

Peqataasut aqutseriaatsip qanoq issinnaaneranik nassuiaaffigineqarnikkut paasitinneqassapput aamma taamaaliornikkut periarfissinneqassapput namminneq siuariaateqarnissaminnut tamakku qanoq piviusumik atorsinnaanerlugit ilikkagassinneqassapput. Ilinniartitsineq teoriinut tunngasunik naatsunik saqqummiussinernik, sungiusarnernik peqataaffiusunik aammalu qulaajaalluni apersuinermik imaqassaaq.

Kikkulluunniit pisortanngornissamut perusussuseqarluartut.