Immikkut siunnersortinut siunnersortillu pisortaannut tapisiaqartitsinermi najoqqutassiat

Kalaallit Nunaanni Namminersorlutik Oqartussaani qitiusumik allattoqarfimmi aammalu taakkua ataanni suliffeqarfinni assigisaannilu kiisalu kommunini aqutsisunut.


Aningaasaqarnermut Sulisoqarnermullu Aqutsisoqarfimmi (ASA-mi) Isumaqatiginninniartarnermut Allaffiup immikkut siunnersortit kiisalu siunnersortit pisortaat pillugit kattuffiit arlallit isumaqatigiissusiorfigai. Immikkut siunnersortit siunnersortillu pisortaat tapisiaqartinneqarsinnaanerat periarfissaqarpat isumaqatigiissummit pineqartumit takuneqarsinnaassaaq.

Immikkut siunnersortitut siunnersortilluunniit pisortaatut tapisiat taamaallaat qinnuteqartunut immikkut piginnaanilinnut tunniunneqartarput. Tassa imaappoq, suleqat minnerpaamik ukiuni arlalinni suliassaqarfimmi (immikkut ilisimasaqarluni) sulisimassaaq suliassallu immikkut piumaqasaatitaqarpata / atuuffeqarpata soorlu:

  • Oqartussaaffiit akimorlugit ataqatigiissaarisuuneq. Assersuutigalugu, sulisoq suliniummik aqutsisuuguni imaluunniit suleqatiminut il.il. suliatigut akisussaaffeqaruni.
  • Nammineerluni aalajangiisinnaatitaaneq. Assersuutigalugu, sulisoq matumani suliamut tunngasunik ilisimasaqarluarluni nammineq aalajangiisinnaallunilu innersuussisinnaassalluni. Malittarisassat naapertorlugit sulisup aalajangiiffigisai nammineerluni aalajangiisinnaassuseqarnermut attuumassuteqanngillat.
  • Aqutsisut suliassaat. Assersuutigalugu aqutsisunut qullerpaanut siunnersuineq, tamanna nalinginnaasumik suleqatip aqutsisua qaninneq avaqqullugu taamaallaat pisarpoq.

Atorfeqareersunut siunnersortit pisortaattut tapisiaqartitsisoqassappat immikkut siunnersortitut ukiuni arlalinni sulisimanissaq piumasaqaataavoq.

Immikkoortortami pisortaq suleqammut immikkut siunnersortitut siunnersortit pisortaattulluunniit tapisiaqarnissaanik "neriorsuisinnaatitaanngilaq" Aningaasaqarnermut Sulisoqarnermullu Aqutsisoqarfiup allakkatigut tamanna akuersissutigisimanngippagu.

Immikkut imaluunniit siunnersortit pisortaattut tapit aallaaviatigut siusinnerpaamik najukkami aqutsisumiit inassuteqaammik Aningaasaqarnermut Sulisoqarnermullu Aqutsisoqarfiup tigusineraniit qaammatip aallaqqaataaniit piviusunngortinneqarsinnaavoq. Kommuninit inassuteqaatinut atuupportaaq imaluunniit kattuffimmit susassaqartumit tapiissutinik isumaqatigiissuteqarniarsinnaaneq pillugu qinnuteqarneq.


Allakkatigut inassuteqaat

Pissutsit imaappata, suleqat immikkut siunnersortitut siunnersortilluunniit pisortaattut tapisiaqarnissaminut innersuunneqarsinnaalluni, immikkoortumi pisortaq taava Aningaasaqarnermut Sulisoqarnermullu Aqutsisoqarfimmut inassuteqaasiussaaq.

Inassuteqaat minnerpaamik paasissutissanik makkuninnga imaqassaaq:

  • Sulisoq pillugu paasissutissat:
    • Atit tamarmik
    • Ulloq inunngorfik
    • Isumaqatigiissut suna atorlugu pineqartoq atorfinitsinneqarpa
    • Sulisoq sumi atorfinitsinneqarpa
    • Sulisoq qanga atorfinitsinneqarpa
  • Tapit suut inassuteqaammi pineqarpat
  • Qaqugu tapiissutit tunniunneqarusuppat
  • Suleqatip suliassaqarfimmini sulinermi piginnaasai pillugit itisiliisumik paasissutissat (immikkut ilisimasat) aamma atorfimmi suleqatip suliassai/ atuuffii.
  • Pisortap atsiornera kiisalu ulloq atsiorfuiusoq

Immikkoortortami pisortap inassuteqaataata saniatigut makku ilanngunneqassapput:

  • Sulisup CV-sa nalunaarsorneri nutartikkat
  • Aaqqissuussaanermi pilersaarusiaq sukumiisoq, tassani takuneqarsinnaalluni immikkut siunnersortip siunnersortilluunniit pisortaata pilersaarutaasumik aaqqissuussaanikkut inissisimaffissaa.
  • Sulisup atorfimmi suliaasa fuldmægtigisut/immikkut siunnersortit allaaserineqarneri kiisalu immikkut imaluunniit siunnersortit pisortaattut atorfiusussami atorfiup suliaasalu allaaserineqarneri
  • Sulisup kingullermik akissarsiaasa allagartaata atorfinitsinneqarneranilu isumaqatigiissutip assilineri (sulisoq kommunimi atorfinitsinneqarsimappat)

Tamatuma kingorna Aningaasaqarnermut Sulisoqarnermullu Aqutsisoqarfiup sulisoq immikkut siunnersortitut imaluunniit siunnersortit pisortaatut tapisianik tunineqassanersoq nalilersoqqissaassavaa.

Sulisoq immikkut atorfimmut tapinik tunineqareersimappat immikkut tapit immikkut imaluunniit siunnersortit pisortaattut tapinik tunniussinerup kingorna suli akilerneqartassanersut pillugit Aningaasaqarnermut Sulisoqarnermullu Aqutsisoqarfik aalajangersimasumik naliliissaaq, isumaqatigiissummi allatut allassimasoqanngippat.

Immikkut siunnersorti pillugu atorfiup inuttarsiuunnera, atorfiup suliassallu allaaserineqarneri kiisalu apeqqutit uunga nassiunneqassapput personale@nanoq.gl.

Immikkut siunnersorti pillugu atorfiup inuttarsiuunnera, atorfiup suliassallu allaaserineqarneri kiisalu apeqqutit uunga nassiunneqassapput isuma@nanoq.gl.


Apeqqutigisatit akineqarpat??