Aningaasaqarnermut Sulisoqarnermullu Aqutsisoqarfik pillugu 

Aningaasaqarnermut Sulisoqarnermullu Aqutsisoqarfik (ASA) aqutsisoqarfiuvoq Aningaasaqarnermut Akileraartarnermullu Naalakkersuisoqarfimmut atasoq. ASA-p siullertut Namminersorlutik Oqartussani immikkoortortaqarfiit sullippai, Namminersorlutillu Oqartussat kommunillu sinnerlugit isumaqatigiissutit isumaqatiginninniutigisarlugit.

ASA 120-nik sulisoqarpoq, taakkununnga ilanngullugit ilinniartut kiisalu ilinniagaqartut ikiortaasut. Taakku immikkoortortaqarfinni sisamani angisuuni agguataarsimapput:

• Aqutsisut
• Akissarsialeriffik aamma Sulisoqarnermut Inatsisilerinermullu allaffik
• Qitiusumik Naatsorsuuserisoqarfik
• Pisiortortarnernut, Ineqartitsigallartarnernut Ininillu Attartuinermut Allaffik

Aqutsisut

Aqutsisuni qullersat tassaapput aqutsisoqarfimmi pisortaq aamma immikkoortortaqarfinni pisortat sisamat, taakkununnga Aqutsisunut allattoqarfik atassuserneqarsimalluni. Aammattaaq aqutsisoqarfimmi pisortaq qitiusumik nutserisoqarfimmut pisortaavoq. Nutserisoqarfimmit allattariarsorluni nutserinerit kiisalu ataatsimiinnerni toqqaanaartumik oqaluttaanerit ingerlanneqartarput.

Aqutsisunut allattoqarfimmit ineriartortitsinermut suliniutit aamma ASA-p iluani ataatsimut suleriutsit suliarineqartarput kiisalu pisortaaqatigiit attaveqarnermik, asa.gl-mut aamma Nanuaqqamut nutaarsiassaqarnermik ikiortarpaat.

Aqutsisunut allattoqarfimmit suliassaq pingaartoq tassaavoq isumaqatigiinniartarneq pillugu ataatsimiititaliarsuup innersuussutaanik malinnaaneq, ilaatigut isumaqatigiissutinik takujuminarsaasarneq ilanngullugu.

Akissarsialeriffik aamma Sulisoqarnermut Inatsisilerinermullu allaffik

Imikkoortortaqarfimmit suliarineqartarput akissarsianik, sulisunut tunngasunik aamma inatsisinut atuutsitsinermut tunngasunik sullissineq. Akissarsialeriffimmit Qitiusumik allaffeqarfinni aamma immikkoortortaqarfinni taakkununnga atasuni qaammammusiallit aamma akunnermusiallit akissarsiassaat suliarineqartarput, taamatuttaarlu ingerlatsinermut allanullu akiligassat tassannga suliarineqartarlutik.   Tamatuma saniatigut immikkoortortaqarfimmit akissarsititseriaatsimut ikiorsiisoqartarlunilu nutarterisoqartarpoq kiisalu kommuninut sullissisoqartarluni. 

Akissarsialeriffimmit aamma Sulisoqarnermut Inatsisilerinermullu allaffimmit Qitiusumik allaffeqarfik kiisalu immikkoortortaqarfiit tassunga atasut tamaasa sinnerlugit, sulilernermut uppernarsaatit, tapinut isumaqatigiinniutigineqarlutik suliarineqartarput. 

Isumaqatigiinniartarnermut Immikkoortortaqarfimmit Namminersorlutik Oqartussat aamma kommunit sinnerlugit sulisitsisutut pisortatigoortumik isumaqatigiinniutigineqartussat isumaqatigiinniutigineqartarput. Tamatuma saniatigut immikkoortortaqarfimmit pisortat sinnerlugit isumaqatigiinniutigineqartussat isumagineqartarput. 

Pisiortortarnernut, Ineqartitsigallartarnernut Ininillu Attartuinermut Allaffik

Tamatumunnga atavoq illuutinik aserfallatsaaliineq aamma qitiusumik allaffeqarfiup illuutaanik ingerlatsineq. Taamatuttaaq, neqeroortitsineq ataqatigiissaakkamillu pisiniarneq, kiisalu Namminersorlutik Oqartussat inaataanni eqqiaaneq. Tamakku saniatigut immikkoortortaqarfimmit utaqqiisaasumik ineqartitsigallartarnerit aqunneqarlutillu ingerlanneqartarput. Suliassaasa ilaat tassaavoq Namminersorlutik Oqartussat neriniartarfiannik, TAMU-mik, ingerlatsineq. 

Qitiusumik Naatsorsuuserisoqarfik

Qitiusumik Naatsorsuuserisoqarfimmit (DcR) Nunatta Karsianik ukiumoortumik naatsorsuusiorneq kiisalu missingersuutinik ataavartumik malitseqartitsisarneq pingaarnertut suliarineqartarput. Immikkoortortaqarfimmit akiligassat akilerneqarnissaat, kiisalu akiligassat isertitassallu nakkutiginissaat qulakkeerneqartarput. Aningaasaqarnermut Tunngasunik- aamma Immikkut Ittumik Naatsorsuuseriffiup Namminersorlutik Oqartussani sulisunut akissarsiassat aamma kommuninut tapiissutit tunniunneqartarneri, kiisalu ineqarnermut tapiissutinik inuussutissarsiutinullu tapersiisarnermi taarsigassarsianik naligiissaarisarnerit akisussaaffigai. Naatsorsuutinik ineriartortitsinermut allaffimmit ilaatigut ASA-mi suleriusaannik digitalinngortitsinerit suliarineqartarput. Immikkoortortaqarfik kingulleq tassaavoq Controlling aamma Missingersuutinik Nakkutilliineq, tassani naligiissaarinerit kiisalu sulinermut piffissamik nalunaarsuisarfimmi Webtas-imi kukkusumik nalunaarsukkanik kukkunersiuisarnerit akisussaaffigineqarput.

Naalakkersuisut Kukkunersiuisoqarfiat 

Naalakkersuisut Kukkunersiuisoqarfiannit ingerlatsinermut aningaasaliissutinik naatsorsuutit naalakkersuisoqarfinnut taakkunanilu immikkoortortaqarfinnut kukkunersiorneqartarput. Tamakkua saniatigut sanaartornermut suliniutinut naammassineqarsimasunut sanaartornermut naatsorsuutit misissorneqartarput. Aammattaaq Naalakkersuisut Kukkunersiuisoqarfiannit whistleblowerimik aaqqissuussinerup aqunneqarnera akisussaaffigineqarpoq.