Teknikikkut ajornartorsiutit silallu pissusia pissutigalugit timmisartut kinguaattoortarput, angalanerlu taamaalilluni sivitsortarluni. Taamatullu pisoqartillugu assigiinngitsutigut sulisoqarnikkut kinguneqartarpoq. Taakkununnga atatillugu atorfiniffigisat qanoq iliuuseqartarnissaat pillugit Aningaasaqarnermut Sulisoqarnermullu Aqutsisoqarfik ilitsersuutinik tulliuttuni tunniussaqassaaq.

Sulisut aalajangersimasumik atorfillit

Sulinermut atatillugu angalanermi ingerlaqqinneq ajulerneq:

Sulinermut atatillugu angalaneq sivitsorneqartutut isigineqassaaq, taamaammallu sulinermut atatillugu angalanermi malittarisassat malillugit atorfilik ullormusiaqartussaavoq.

Atorfillip isumaqatigiissutaa malillugu piffissaq suliffigisaa, akunnerillu suliffigisaanut tunngatillugu najoqqutassat ullormi pineqartumi atuuttut naapertorlugit naatsorsorneqassapput.

Feeriarnermut atatillugu angalanermi ingerlariaqqinneq ajulerneq:

Atorfillit feeriartillutik, qaangiuttoornermut taarsiullugu assigisaanilluunniit pissuteqarlutik sulinngiffeqartut isumaqatigiissutit malillugit suliartorsinnaanngitsut sulinngitsoornerat akuerisaasumik sulinngitsoorneruvoq, taamaammallu akissarsiaminni ilanngaaffigineqassanngillat. Sulinngitsoornerit feeriatut imaluunniit qaangiuttoornermut taarsiullugu sulinngiffeqarnertut ilanngaatigineqassapput.

Sulilerlaat kinguaattoortut:

Taamatut pisoqartillugu akuerisaalluni piaarinanilu sulinngitsoorneruvoq. Taamaammat taanna atorfilik ullormit atorfinitsitsinermut allakkani allassimasutut sulilersinneqassaaq akissarsiaqartinneqassallunilu. Atorfillip isumaqatigiissutaa malillugu piffissaq suliffigisaa, akunnerillu suliffigisaanut tunngatillugu najoqqutassat ullormi pineqartumi atuuttut naapertorlugit naatsorsorneqassapput. Pisuni taamaattuni piffissaq suliffiusoq sulinermut atatillugu angalanermi piffissaq suliffiusutut isigineqassanngilaq, taamaammat ullormusianik tunniussisoqassanngilaq.

Vikarit

Danmarkimiit ingerlaqqinneq ajulerneq:

Taamatut pisoqartillugu akuerisaalluni piaarinanilu sulinngitsoorneruvoq. Taamaattorli sulisut aalajangersimasumik atorfillit assigalugit vikarip aalajangersimasuunnginnera pissutigalugu aallarneraniit aatsaat akissarsiaqartinneqarnera aallartissaaq. Atorfinitsitsinermut allakkani allassimasutut ullormit sulilerneraniit naatsorsuisoqartassaaq.

Kalaallit Nunaanniit ingerlaqqinneq ajulerneq:

Atorfinitsitsinermut allakkani allassimasutut ulloq aalajangiunneqartoq naapertorlugu atorfeqartitaaneq atorunnaartutut isigineqassaaq, taamaattorli Kalaallit Nunaata qimassinnaalernissaata tungaanut vikarip suliinnarsinnaanera pillugu suliffeqarfiup vikari isumaqatigiissuteqarfigissagaa innersuussutigineqarpoq.

Qanorluunniit pisoqaraluarpat vikarit Kalaallit Nunaanniit aallarsinnaalernissami tungaanut iniminni najugaqarallaannarnissaat innersuussutigineqarpoq.

Sulinermut atatillugu angalanermi aningaasartuuteqarnerulernermut taarsiissuteqarfigineqarnissaq

Ilaasut ingerlaqqinneq ajulerpata pisariaqarnera naapertorlugu Air Greenland nerisaqartitsillunilu unnuinissamut isumaginnittuussaaq. Taamaammat Air Greenland sulinermut atatillugu angalasup unnuineranut nerisaqarneranullu akiliisimaguni sulinermut atatillugu angalasut nerisanut unnuinermulluunniit aningaasartuutit sulinermut atatillugu angalanermi naatsorsuutinut ilannguttassanngilaat.