Namminersorlutik Oqartussat Nuummi sulisunut inissiaataat Pisiortortarnernut, Sanaartornernut Ineqartitsigallartarnernullu Allaffimmit (IBI) aqunneqarput.
_____________________________________________________________________________________________

Sulisunut inissiamik tunineqarneq

Utaqqiisaasumik inissianut allanillu utaqqiisaasumik najugaqartitsinermut atatillugu suliassat tamakkerlugit, matuersaatinik tunniussisarnerit il.il Pisiortortarnernut, Sanaartornernut Ineqartitsigallartarnernullu Allaffiup isumagisarpai.

Agguaassinermi najoqqutassaq

Atorfinnik inuttassarsiuinerit inissiartallit Naalakkersuisoqarfiit akornanni agguarneqaleraangata Pisiortortarnernut, Sanaartornernut Ineqartitsigallartarnernullu Allaffiup agguaassinermi najoqqutassaq atortarpaa. Naalakkersuisoqarfiit taakkulu immikkoortortaqarfiini ukioq naallugu atorfiit amerlassusii aallaavigalugit agguaassinermi najoqqutassiaq suliarineqartarpoq kingornalu naalakkersuinikkut naleqqussarneqartarluni.

Tunniussuisarnerit

Pisiortortarnernut, Sanaartornernut Ineqartitsigallartarnernullu Allaffik qaammatit tamaasa ulluinnarmi siullermi naalakkersuisoqarfinnut atassuteqassaaq atorfiillu inuttassarsiuunneqartut sulisunut inissiaqartinneqartut amerlassusai ilisimatitsissutigalugit. Atorfiit inissaqartitsiviusut inuttassarsiuunneqarsinnaasut tamarmik immikkuullarissumik "innersuussap normua"-nik tunineqassapput.

Tunniussuinerni tamani inissiat qassiussanersut siumoortumik ilisimatitsissutigineqarsinnaanngillat, tassa tassani tamatigut - piffissami tassani - apeqqutaasarmat utaqqiisaasumik kiisalu sulisunut inissiat qassiunersut.

Innersuussap normua

Innersuussap normua atorlugu atorfinnik allagarsiussinerit tamarmik asseqannginnissaat qulakkeerneqassaaq kiisalu atorfimmut allagarsiussamut eqqortumut sulisunut inissiamik noqqaassummut kiisalu atorfinitsitsinermi immersuiffissamut atassuteqarnissaaannut periarfissiisoqarluni. Taamaalilluni innersuussap normua atorlugu atorfiit qassit akuerineqarneri qassillu itigartinneqarneri, tullianilu qassit inissaqartitsiviusumik allagarsiunneqarnersut, kiisalu taakkunannga qassit sulisunut inissiamik pissarsiniunneqarnerat pillugu kisitsisitigut paasissutissaliornissamut periarfissiisoqarpoq.

Naalakkersuisoqarfiit ataasiakkaat tulleriissaarissapput

Tassa "tunniussuinermi" Naalakkersuisoqarfiit tamarmik immikkut inissianik aalajangersimasunik amerlassusilinnik agguaanneqartarput, Naalakkersuisoqarfiup nammineq tulleriissaagaanik atorsinnaasaanillu. Naalakkersuisoqarfiup taamaalilluni nammineerluni aalajangersinnaavaa, Naalakkersuisoqarfimmi taassumalu immikkoortortaqarfiini atorfiit sorliit, inissianit agguaanneqartunit inissiartaqartillugit inuttassarsiussanerlugit. Utaqqiisaasumik inissiani inissaqartitsisarneq qitiusumit ASA aqqutigalugu suli aningaasalersorneqartassaaq.

Tunniussuinermut atatillugu atorfik inissaqartitsiviusumik taamaallaat inuttassarsiorneqarsinnaavoq.

Utaqqiisaasumik inissiami najugaqarneq nammineq aningaasaatinik akilersorneqartillugu atorfik sulisumut inissaqartitsiviusoq inuttassarsiuutissallugu immikkoortortaqarfiit periarfissaqanngilaq, tassa naalakkersuisoqarfimmit itigartitaasimagussi.

Taamaattumik atorfiit inissaqartitsiviusut naalakkersuisoqarfimmit akuerineqartut kisimik inuttassarsiorneqarsinnaapput. Atorfiit allat tamarmik inissartaqanngitsumik inuttassarsiorneqassapput.

Piffissaliussat

Tunniussuinerni tamani Pisiortortarnernut, Sanaartornernut Ineqartitsigallartarnernullu Allaffiup Naalakkersuisoqarfinnut ataasiakkaanut inissiat qassiunersut nalunaarutigissavai. Ilutigitillugu sisamanik piffissaliussisoqassaaq:

1. Sulisunut inissiat amerlassusilerlugit agguaanneqartut atorniarneqarnersut Naalakkersuisoqarfiup qaqugukkut nalunaaruteqarnissaanut piffissaliineq. Nalinginnaasumik agguaassineq pillugu nalunaaruteqarnermit sap. akunnerata ataatsip qaangiunnerani
2. Atorfiup inissaqartitsiviusup kingusinnerpaamik qaqugukkut allagarsiissutiginissaanut piffissaliineq, nalinginnaasumik agguaassineq pillugu nalunaaruteqarnermit sap. akunneri pingasut qaangiunneranni.
3. Inissiamik inniminniissutip nassiunnissaanut imaluunniit inissaqartitsisinnaanerup atorumannginnera pillugu ilisimatitsinissamut piffissaliineq, nalinginnaasumik sulilernissaq sioqqullugu kingusinnerpaamik sap. akunneri tallimat sioqqullugit.
4. Atorfiup kingusinnerpaamik qaqugukkut inuttalersimanissaanut piffissaliineq, nalinginnaasumik tunniussinermit qaammatit pingasut qaangiunneranni.

Sulisunut inissiat naalakkersuisoqarfiit ataasiakkaarlutik atorumanngisaat, Naalakkersuisoqarfinnut allanut agguaanneqassapput.

Piffissaliussaq imm. 1-imi nassuiarneqartoq malinneqanngippat, nalunaarutiginagu innersuussap normua atorunnaarsinneqassaaq. Piffissaliussat imm. 2 - 4-mi nassuiarneqartut malinneqanngippata, qaammatit aallartinnerini PM-ip naalakkersuisoqarfianut kr. 10.000,-.

Atorfinittut inissiamik kissaateqanngitsut

Sulisunut inissaqartitsisinnaaneq atorfinittup atorumanngippagu, tamanna atorfininnermi isumaqatigiissummut allanneqassaaq. Sulisup sulisunut inissiaq piumanngippagu, tamanna sulisumut kingusinnerusukkut neqeroorutigineqarsinnaanngilaq.

Atorfinnut nutaamik inuttassarsiorneqartunut taamaallaat inissiat atorneqarsinnaapput

Sulisunut inissiat taamaallaat, atorfimmik inuttassarsiuilluni allagarsiussinermi, sulisunut inissiamik neqerooruteqarnermik allassimasunut qinnuteqartunut neqeroorutigineqarsinnaapput. Atorfininnermi isumaqatigiissutini allassimanngippat sulisooreersunut sulisunut inissiat tunniunneqarsinnaanngillat.