Atorfinitsitsinermi oqaloqatigiinnerit

Atorfik inuttassarsiugaq

Pisortaqarfinni  atorfiit inuttassarsiorneqartussat tamarmik saqqummiussinikkut inuttassarsiuunneqartarnissaat aallaavigineqassaaq. Kikkut tamarmik pisortani atorfiit sorliit inuttaqannginnerinik takunnissinnaanissaat siunertaralugu taamaaliortoqassaaq. Pisortat sulisut pitsaanerpaat atorfinitsinneqarnissaat pingaartinnerusarpaat, taamaattumillu pisortat siammasissumik pissarsiortassapput.

Namminersorlutik Oqartussani qitiusumik allattoqarfimmi sulisunik aamma suliffeqarfinni namminersortuutitani il. il. pisortaanernik atorfinitsitsisarneq pillugu kaalajallaasitat pigineqarput, tassanilu allassimavoq atorfiit tamarmik sivikinnerpaamik sapaatit akunnerini pingasuni saqqumisimassasut.

Kaajallaasitami allassimavortaaq, atorfiit tullinnguuttut inuttassarsiuuttariaqanngitsut:

• Naalakkersuisut allattai
• Taartaagallartut imaluunniit qaammat ataaseq tikillugu atorfeqarallartut
• Ilinniartut
• Ilinniarnertuut ikiortaasut
• Suliffimmik misiliisut akissarsiaqaratik
• Kajumissutsiminik suleqataasoq
• Nalunaaquttap akunneranut akissarsiaqartut

Allaffimmi atorfik inuttaqanngippat allaffiullu atorfik inuttassarsiuunniarlugu inuttassarsiuussinerup imarisassai pillugit aalajangersimasunik piumasaqaateqarpoq. Atorfimmik inuttassarsiornerit paasissutissanik makkuninnga imaqassapput:

• Atorfiup taaguutaa
• Suliffiup sumiiffia
• Akissarsiat atorfinitsitaanermilu atugassarititaasut
• Suliassat pingaarnerit
• Piginnaasatut piumasaqaatit
  • Piginnaasat nalinginnaasut
  • Sulianut tunngasutigut piginnaasat
  • Kalaallisut, danskisut, tuluttullu oqaatsitigut piginnaasat
  • Kalaallit kulturiannik inuiaqatigiinnerannillu ilisimasaqarneq

Sulititsisup sulisussanik kissaatigisaminik killilersorneqarnani sulisussarsiorsinnaanissaa aallaavigineqassaaq. Taamaakkarluatoq eqqaamaneqassaaq suliassap naammassinissaanut pingaaruteqanngitsunik pingaarnersiuisoqassanngimmat. Immikkoortitsisoqaqqusaanngilaq.

atorfnitsitsisarneq pillugu ataatsimiititaq

Qitiusumik allaffeqarfimmi atorfik inuttaqanngitsoq inuttalerneqassappat atorfinitsitsisarneq pillugu ataatsimiititaliamik pilersitsisoqassaaq. Naalakkersuisoqarfimmi pisortaanermik suliffeqarfinniluunniit namminersortitani pisortaanernik il. il. atorfinitsitsiniarnermi naliliisarnermik ataatsimiititaliamik pilersitsisoqassaaq.

atorfinitsitsisarneq pillugu ataatsimiititaliaq minnerpaamik ukuninnga inuttaqassaaq:

• Aqutsisut aallartitaat
• Sulisut sinnerlugit toqqagaq ataaseq

Atorfinitsitsisarneq pillugu ataatsimiititaliaq qinnuteqartunik nalilersueqqissaarneq aallaavigalugu inassuteqassaaq. Sulisunut pisortaasutut akisussaasoq sulisumik atorfinitsitsinissaq pillugu inaarutaasumik aalajangiisuussaaq.

Atorfinitsitsinissaq pillugu oqaloqatigiinneq

Atorfinitsitsinermut ataatsimiititaliap qassit kikkullu – pisariaqarpat – atorfinitsitsinissamut oqaloqatiginnikkiartoqquneqassanersut aalajangissavaat.

Atorfinitsitsinissamut oqaloqatigiinnermi qinnuteqartoq atorfimmut allaffimmullu tulluartuunersoq paasiniarlugu atorneqassaaq. Qinnuteqartoq inuttut piginnaasatigullu/ilinniakkatigullu tulluartuussaaq.

Sulititsisup sammisanik sunilluunniit atorfimmut suliassallu naammassinissaanut naapertuuttunik apeqquteqarsinnaanissaa aallaavigineqassaaq. Sulititsisoq atorfimmut attuumassuteqanngitsunik apereqqusaanngilaq soorlu ”meerartaaqqinnissamaarpit?”.

Sammisat ilaat apeqquteqarfigissallugit immikkut mianerisassaasinnaapput. Sammisat ilaat tassaapput:

• Peqqissuseq
• Upperisarsiorneq, politikikkut aalajangiusimasaqarneq aamma atoqatigiittarnermik isiginninneq.
• Ukiut
• Innarluutillit
• Meeqqat naartunerlu

Siuliani allassimasut atorfimmut pineqartumut tulluarpata, soorunami apeqqutigineqarsinnaapput. Suliamut atatillugu atorfimmi suliassat naammassinissaannut peqqissutsimut tunngasunik imaluunniit atorfinittussaq biilersinnaanermut allagartaqartariaqarpat qinnuteqartoq 18-iliisimanersoq apersortoqarsinnaavoq.'' Apeqqutit atorfik pillugu oqaloqatigiinnermi suliassanut naapertuunnissaat pisariaqartuinnaanissaallu matumani qitiutinneqassapput.

Innersuussutit

Innersuussutit iluaqutaasinnaapput, kisianni piumasaqaataanngillat

Innersuussutit siunertaat tassaapput qinnuteqartunik nalilersuinissamut tunngavissatut atorfinitsitsinermi ataatsimiititaliap ilisimasaqarnerulernissaa. Taamaakkaluartoq innersuussutit tatiginannginnissaasarnerisa eqqaamaneqarnissaa pingaaruteqarpoq, pissutigalugu qinnuteqartup innersuussissutit toqqagarimmagit taamaattumillu qinnuteqartoq pillugu ajunngitsumik amerlanertigut nassuiaateqartassallutik.

Eqqaamassavat qinnuteqartup maanna atorfigisani pillugu innersuussissutitut atorusunnissaa qaqutigoormat.

Qinnuteqartup innersuussissutinik ilanngusserusunnerluni nammineq aalajangissavaa. Qinnuteqartumit akuersissummik pissarseqaartinnani suliffigisimasanut aqutsisorisimasanulluunniit qinnuteqartoq pillugu suliffik attaveqassanngilaq.

Aningaasaqarnermut Sulisoqarnermullu Aqutsisoqarfiup siunnersuutigaa kina attavigineqassanersoq pillugu isumaqatigiissut qinnuteqartumit tamatigut allakkatigut pissarsiarineqartassasoq.