Sulisut ataasiakkaat soraarnissamut ilimasaarinermut sulisup isumaqatigiissutaa apeqqutaavoq. Atorfillit pillugit inatsimmi malittarisassat malillugit atorfiliugaanni ataani allattorsimasunut naapertuuttumik sivikinnerpaamik soraarnissamut ilimasaarisoqarsinnaavoq. Sulisup isumaqatigiissutaa ilimasaarinerup sivitsorneqarnissaanut periarfissiisinnaavoq.

Sulisup tungaaniit soraarnissaq qaammatip naaneraniit qaammammik ataatsimik ilisimasaarinikkut soraarsinnaavoq. Taamaattoq atorfiliup tungaanit soraarnissamik nalunaaruteqarfissap sivitsorneqarnissaa pillugu allaganngorlugu isumaqatigiissusiornikkut aalajangiisoqarsinnaavoq, tassa sulisitsisumit soraarsitsinissamik kalerriinissaq assingusumik sivitsorneqarsinnaasoq naatsorsuutigineqarsinnaappat.

Sulisoq atorfimminit soraarusuppat namminerlu soraarnissamut ilimasaarutigisap naanissaa sioqqullugu kingullermik akissarsiaqassappat ullormilu sulissappat sulisitsisumit tamanna akuerineqassasoq aalajangiunneqarsinnaavoq. Taamaattorli sulisitsisup sulisoq pisussaaffimminik naammaassin-nissasoq piffissamilu soraarfissami tungaanut sulissasoq aamma piumasarisinnaavaa, tamatumunngalu sulisoq aamma pisussaaffeqarpoq. Tamanna sulisitsisup aalajangigaraa.

Sulinissamik isumaqatigiissummut atatillugu atorfilik taassumalu ilaqutai atorfeqarnermut atatillugu ineqartinneqarpata, minnerpaamik qaammatit pingasut sioqqullugit sulisitsisoq soraarsitsinissamik kalerriissaaq.