Sulisinnaannginneq pillugu nakorsap oqaaseqaataa

Suleqatigiinneq illuatungeriinnut artukkiisumik isumaqatigiissutaavoq tassa imaappoq, atorfilik sulinissaminut piareersimasussaavoq, sulisitsisullu suliassap suliarineqarneranut taarsiissutitut akissarsianik akiliissaaq. Sulisup napparsimanini peqqutigalugu sulisinnaanngippat sulisitsisup sulisinnaannginneq pillugu nakorsap oqaaseqaataa piumasarisinnaavaa. 

Nakorsap oqaaseqaataa pillugu maleruagassat isumaqatigiissuteqarnermi aqutsinermilu inatsimmeersuupput.  

Sulisitsisoq oqaaseqaammik piumasaqarsimappat, taava sulisup nammineerluni sulisinnaannginnermut oqaaseqaat nakorsamut qinnuteqaatigissavaa. 

Nakorsap sulisup suna nappaatigineraa pillugu sulisitsisumut ilisimatitseqqusaanngilaq. Sulisitsisoq taamatuttaaq sulisup sumik nappaateqarneranik apereqqusaanngilaq.

Sulisinnaajunnaarnermi oqaaseqaammi taamaallaat takuneqarsinnaapput: 

• Ulloq sulisinnaajunnaarfik
• Sulisinnaannginnermut peqqutaasoq (napparsimaneq, sulitilluni ajoqusersimaneq imaluunniit naartunermut atatillugu napparsimaneq)
• Sulisinnaannginnerup sivisussusaa.

Sulisitsisut aamma atorfillit akornanni Inatsisitigut pissutsit pillugit Inatsisartut inatsisaat nr. 11, 29. november 2013-imeersumi § 7, imm. 1-imi allaqqavoq: 

• Sulisartut sulinngikkallarnerminni pisussaaffii pillugit maleruaqqusat nalinginnaasut malillugit atorfiliup sulinnginnissani pillugu sulisitsisuni piaarnerpaamik nalunaarfigisussaavaa.
• Atorfiliup napparsimanini peqqutissaqavissumik sulinngitsoornertut akueritissaguniuk, napparsimalluni suliartunnginnissani piaarnerpaamik sulisitsisuminut nalunaarutigissavaa. Atorfillip napparsimanini nalunaarutiginngikkuniuk, nalunaaruteqarnissamullu akornutissaqarsimanngippat taava pissutissaqavinngitsumik sulinngitsoornerussaaq.  Taama pisoqartillugu sulisitsisoq soraarsitsisinnaavoq imaluunniit qanoq pisoqarnera aallaavigalugu sulisitsisup atorfilik suliffimmit peersissinnaavaa.
• Sulisitsisumik isumaqatigiissuteqanngikkaluaraanniluunniit napparsimaneq ullunik arlalinnik sivisussuseqarpat, sulisitsisup atorfilik piumasaqarfigisinnaavaa nakorsap allagarsiussaatigut napparsimanermut oqaaseqaammik tunniusseqqullugu. Sulisitsisup aalajangersinnaavaa, qaqugukkut napparsimanermik nalunaarut tunniunneqassanersoq.  

Inatsimmut nassuiaatini erseqqarissumik takuneqarsinnaavoq, sulisitsisoq pisariaqanngitsumik kinguarsaanani nalunaarfigineqarsimappat, akuerisamik takkutsinngitsoornerusoq. Sulisitsisup pisussaaffigaa sulisoq ilisimatissallugu qanoq, qaqugu kimullu napparsimanermik nalunaaruteqartoqassanersoq.  Aningaasaqarnermut Sulisoqarnermullu Aqutsisoqarfiup innersuussutigaa, suliffeqarfik napparsimalluni sulisinnaannginneq pillugu malittarisassanik allassimasuuteqarnissat, sulisunut politikkit pillugit erseqqinnerusumik atuarneqarsinnaapput una toorlugu.  

Periuseq tassaavoq sulisoq napparsimalluni nalunaarsimappat, sulisitsisup sulisoq sulisinnaannginneq pillugu nakorsap oqaaseqaasiaanik qinnuteqarnissaa piumasaqarfigissavaa.  Sulisinnaannginneq pillugu nakorsap oqaaseqaasiaanik piumasaqaat, tamatigut allakkatiguusassaaq oqaaseqaasiallu tiguneqarnissaanut piffissarititaasoq kingusinnerpaaq ilisimatitsissutigineqartassalluni. 

Sulisitsisup sulisinnaannginneq pillugu nakorsap oqaaseqaasiaa piumappagu, aningaasartuutit sulisitsisup akilissavai.  Sulisitsisup taamaallaat sulisinnaannginneq pillugu nakorsap oqaaseqaasiaa akilissavaa, aningaasartuutit allat soorlu angalanerit sulisup nammineq akilissavai.  

Namminersorluni Oqartussani Napparsimalluni sulinngiffeqartarneq pillugu politikkimi tunngaviusoq tassaavoq, sulisup ullup sisamassaanik napparsimanerani sulisitsisup nakorsap oqaaseqaasiaanik piumasaqarsinnaatitaanera.    Ullormi siullermi napparsimanermi aalajangersimasumik ataasiakkaatigullu nalilersuereernerup kingorna, immikkut ittumik sulisinnaannginneq pillugu nakorsap oqaaseqaasiaanik piumasaqartoqarsinnaavoq. 

Sulisinnaannginneq pillugu nakorsap uppernarsaasiaanut tunngatillugu maani allaqqasuni apeqqutitit akineqarsimanngippata, siunnersortinnissamut nassiussinikkut inatsisilerituut ugguuna attavigikkit.  

Napparsimaneq peqqutigalugu sulinngitsoortarneq pillugu oqaloqateqarnissamik siunnersorterusukkuit una tooruk.  

Sivisunerusumik napparsimaneq imaluunniit ulluni 120-ni malittarisassaq pillugu annertunerusumik siunnersorterusukkuit una tooruk.