Erninerup kingorna sulinngiffeqarneq

Naartunermi, erninermi meeravissiartaarnermilu sulinngiffeqarsinnaatsitaaneq Meerartaareernerup kingorna sulinngiffeqarneq.

Naartunerup nalaani napparsimaneq

Nakorsap naartuneq pissusissamisuunnginnerarpagu, arnallu suliinnarnera arnap naartullu peqqissusaannut innarliisinnaappat arnaq pisinnaatitaavoq sulinngiffeqarsinnaanerminut. 

Naartunerup nalaani napparsimalertoqassappat sulisitsisoq pisinnaatsitaavoq nakorsamit allagartamik uppernarsaamik sulisumit takutitsiffigineqarnissaminut.  Taana annertunerusumik atuarneqarsinnaavoq uani .

Sulititsisoq naartusumut naleqqussakkanik suliassaqartitsisinnaavoq taamaaliortariaqarlunilu, taamaasilluni naartusoq suliffimmini suliinnarniassammat.  Arnap naartunermi nalaani suliakkiussamut itigartitsisinnaatsitaavoq, suliakkiussap sulinermi nalaani nalinginnaasumik suliarisartakkaminit allaaneruallaarpat.  Tamanna pillugu naliliinnissamut ikiorneqartariaqaruni, Namminersorlutik Oqartussat sulisitsisoqarneq pillugu inatsisilerituuat attavigineqarsinnaavoq uani.

Naartusoq naartunermi nalaani naartunini pillugu sulinngitsoq suliffimminit soraarsinneqarsinnaanngilaq.  Tamanna pissangaluarpat suiaasutsimik immikkoortitsinerussaaq.

Naartunermi sulinngiffeqarsinnaannermut inatsit

Naartusoq erninissaminut sap.ak. sisamat sioqqullugit sulinngiffeqarsinnaatsitaavoq.  Sulisitsisup ullormut killiliussamut naatsorsuinerminut atugassaminik naartunermut uppernarsaat atussavaa, taannalu sulisup peqqinnissaqarfimmut piniassavaa.

Naartusoq ulloq naatsorsuusaq sioqqullugu ernippat, taava erninermut tungatillugu sulinnngiffeqarneq taamaaqataanik sivikinnerussaaq.  Naartusulli ulloq killiliussaq qaangerlugu erniguni killiliussamik qaangiinerup sivisoqataanik sivitsorneqassaaq.

Arnap sulinngiffeqarsinnaatitaanera

Ataatsimik ernereernermi arnap sap.ak. 15-ini sulinngiffeqarnissani pisinnaatsitaaffigaa. Marlulisimaguni arlalinnilluunniit ernisimaguni ernereernerup kingorna sap.ak. 19-ini sulinngiffeqarsinnaatitaavoq. 

Ernereernermi sulinngiffeqarneq ulloq erniffik aallarniutaassaaq. 

Ataataasup anaanaaqataasulluunniit sulinngiffeqarsinnaannerat

Ataataasoq anaanaaqataasorluunniit sap.ak. pingasuni meerartaarnermut atatillugu sulinngiffeqarnissaminnut pisinnaatitaapput, tamannalu erninerup kingorna sap. ak. 15-it  siulliit iluanni pisinnaalluni. Marlulisoqarnerani arlalinnilluunniit meerartaarnermi taakku sap. ak. pingasut siulliit sap ak. 19-nit iluanni sulinngiffeqarfiussapput.

Oqaaseq "Ataata" ima paasineqassaaaq ataataasoq Meeqqat inatsisitigut inissisimanerat Kalaallit Nunaannut inatsimmi malittarisassat malillugit.

Oqaaseq "anaanaaqataasoq"ima paasineqassaaq, arnaq inatsisit malillugit meeqqamut anaanaaqataasutut nalunaarsorsimasoq.

Angajoqqaatut sulinngiffeqarneq

Ataatsimik meerartaarnermi angajoqqaanngortut ataatsimut sap. ak. 21-nik sulinngiffeqarsinnaatitaapput.  Angajoqqaanngortut sulinngiffeqarsinnaannerat ernereernerup kingorna sap. ak. siulliit 15-init iluani pissaaq.

Marlulissanik arlalinnilluunniit meerartaarnermi angajoqqaanngortut katillugit sap. ak. 25-it sulinngiffeqarsinnaatitaapput. Angajoqqaat sulinngiffeqartarnerat erninerup kinguninngua sap. ak. 19-it siulliit iluanni pissaaq.

Angajoqqaat sulinngiffeqarsinnaatitaannerat angajoqqaat taamaallaat ataasiakkaarlutik atorsinnaavaat.

Sulinngiffeqarneq nikerartumik piffissaligaq

Sulisitsisup isumaqatigineratigut sap. ak. 4-nik sulinngiffeqarfiusussat sinneruttut nikerartumik aaqqissuuneqarsinnaaapput. Angajoqqaap aappaa sulinngiffissaq suli naanngitsoq suliartoruni, sulinngiffeqarsinnaatitaaneq akunnernik amerlaqataanik sulinngiffeqarfiusussaq ilaneqassaaq.

Sulisitsisumik isumaqatigiissuteqarnikkut angajoqqaap sulinngiffeqarfissaa sap. ak. tallimanik kinguartitsisinnaavoq.  Sulinngiffeqarfiusussap sinnera meeqqap tallimanik ukioqalinnginnerani atorneqareersimassapput.  Sulinngiffiusussap sinnera sapaatip akunneranik ataatsimit ataannartumit sivikinnermik atorneqartussaanngilaq.   

Angajoqqaat arlamik sulinngiffeqarsinnaatitaaneranik tigusisinnaatitaanerat

Angajoqqaap aapparmi erninerup kingorna sulinngiffeqarsinnaatitaanera atorsinnaavaa makku pisimappata:

• Angajoqqaaq sulinngiffeqartoq toquppat
• Angajoqqaaq sulinngiffeqartoq napparsimarulunnini pissutigalugu meeqqamik paarsisinnaanngippat, imaluunniit
• Immikkut ittumik pisoqartillugu – assersuutigalugu anaanaasoq illoqarfimmi allami ilinniarnissamut akuerisaappat, meeqqallu arnani ilagalugu nooqataanissaa siunertamut naapertuutinngippat. Pisumi tassani ataataasoq anaanaaqataasorluunniit sulinngiffeqarsinnaatitaaneranik atuisinnaavoq.

Sulisoq angajoqqaaqatimi sulinngiffeqarsinnaatitaaneranik atuilersoq sulisitsisuminut nalunaaruteqassaaq sulinngiffeqarsinnaatitaanermik atuilerluni kiisalu erninermi sulinngiffiup sivisussusaa ilanngullugu ilisimatitsissutigissallugu.   Nalunaaruteqarneq piaarnerpaamik pissaaq.

Meeqqap peqqinnissaqarfimmut unikkallarnera

Meeraq angajoqqaat sulinngiffeqarfigisinnaasaanni peqqinnissaqarfimmut unitsitaassagaluarpat erninermi sulinngiffeqarneq peqqinnissaqarfimmut unitsitaanerata sivisoqataanik sivitsorneqassaaq.  Tamannali ataataasumut/anaannaaqqaattaasumut sap. ak 3. sulinngiffeqaataasussamut aalajangersakkamut atuutinngilaq.

Piffissarli sulinngiffeqarfiusoq sivisunerpaamik sapaatit akunnerinik 13-inik sivitsorneqarsinnaavoq. Tamatuma pissuseqataa atuuppoq meeraq napparsimanini pissutigalugu piffissap erninerup kingornatigut nalinginnaasumik uningaviusartup kingornatigut angerlartinneqarsinnaanngippat. Tamanna nakorsamit nalilersorneqassaaq, sulinngiffeqarnerullu sivitsunnginnerani peqqinnissaqarfimmit uppernarsaammik pissarsisoqaqqaartariaqarluni. 

Meeqqap napparsimmavimmut unitsinneqarnera pillugu ilisimaleriaannaraa suleqataasup sulisitsisuni tamatuminnga nalunaarfigissavaa, kiisalu meeqqap angerlartinneqarnera kiisalu sulinngiffeqarnerup sivitsuutissaa ilanngullugit nalunaarutigissallugit.  Tamatumani tunngavilersuutigineqarpoq sulisitsisup ingerlatsinermik pilersaarusiornerminut nalimmassaasariaqarmat, ilaatigullu erninermi sulinngiffeqartumut taartaasup atorfeqartinneranik sivitsuisinnaajumalluni.  

Erninermi sulinngiffeqarsinnaatitaaneq meeraq toqungalluni erniuppat, meeravissianngortinneqarpat, Meeqqat tapersersorneqarnissaannut Inatsisartut inatsisaat naapertorlugu meeraq angersimaffiup avataanut inissinneqarpat, imaluunniit meeraq erniunerminit sapaatit akunnerini siullerni 15-ini kiisalu 19-ini toquppat

Meeraq toqungalluni erniuppat anaanaasoq ataatsimik ernippat sapaatit akunnerini 15-ini suli sulinngiffeqarsinnaatitaavoq kiisalu marlulisimappat amerlanernilluunniit naartunermi ataatsimi ernippat sapaatit akunnerini 19-ini sulinngiffeqarsinnaatitaalluni. 

Anaanaaqataasoq imlt. ataataasoq aamma sapaatit akunnerini pingasuni sulinngiffeqarsinnaavoq.

Uani pineqarpoq meeraq toqungalluni erniusoq, sapaatit akunnerini 22-ni naarmioreerluni uummarsinameranik takussutissaqarani erniusoq.  Naartu erniunermi kingorna uumasimappat inuulluni erniusimasutut naatsorsuutigineqartuaannarpoq. Meeraq ernioreernermi kingorna uumasimanersoq nakorsamit nalilerneqassaaq. 

Meeraq toquppat anaanaasorlu angajoqqaarsiavinngortorluunniit sapaatit akunnerini sisamanik sivikinnernik sinneruttunik sulinngiffissaqarpat anaanaasoq angajoqqaarsiavinngortorluunniit sapaatit akunnerini sisamani aliasunnini pissutigalugu sulinngiffeqarsinnaatitaavoq.  Tassa imaappoq, anaanaasoq angajoqqaarsiavinngortorluunniit sapaatip akunneranik ataatsimik suli sulinngiffeqassappat taava sapaatit akunnerini pingasuni suli sulinngiffeqarallarsinnaatitaavoq. 

Anaanaasoq aamma ataataasoq/anaanaaqataasoq sapaatit akunneri sisamat angullugit sulinngiffeqarsinnaatitaapput. 

Sulinngiffeqarfiusussamik kipititsineq

Naartunermi sulinngiffeqarneq (sapaatit akunneri sisamat), ataataasup/anaanaaqataasup sulinngiffeqarnera (sapaatit akunneri pingasut), arnap sulinngiffeqarnera (sapaatit akunneri 15-it imaluunniit 19-init) imaluunniit angajoqqaajusutut sulinngiffeqarneq (sapaatit akunneri 21-it 25-illuunniit) kipitinneqarpata sulinngiffeqaataasussat sinneri atorunnaassapput. 

Sulinngiffeqarneq atorunnaartutut isigineqassaaq sulineq ilinniarnerluunniit aallarteqqinneqarpata imaluunniit aallartinneqarpata angajoqqaajusup aappaata sulinngiffeqarnini tassunga atatillugu aallartippagu, pissutsit immikkut ittut pineqanngippata. 

Feeriarneq aamma sulinngiffeqartitsinermik atorunnaarsitsisarpoq.

Sulisitsisumut naartuneq pillugu sulinngiffeqarnerlu pillugit nalunaartussaatitaaneq

Naartusup sulisitsisuminut naartunerminik nalunaartussaatitaavoq erninissamut ulluliussap kingusinnerpaamik sapaatit akunneri 13-it sioqqullugit.  Arnap erninermut atatillugu sulinngiffeqarnini qaqugu aallartissallugu naatsorsuutiginerini sulisitsisuminut tamatumunnga peqatigitillugu ilisimatitsissutigissavaa.

Arnap, erninermi kingornatigut kingusinnerpaamik sapaatit akunneri aqqaneq-marluk kingornatigut, qaqugu sulileqqinnissani naatsorsuutiginerini sulisitsisuminut ilisimatitsissutigissavaa.

Ataataasoq anaanaaqataasorluunniit sulinngiffeqarniarluni kissaateqaruni taassuma sulisitsisuni sulinngiffeqarnissatut naatsorsuutigisaq sapaatit akunnerinik sisamanik sioqqutsilluni tamatuminnga nalunaarfigissavaa. 

Meeraq napparsimmavimmut unitsinneqarpat sulinngiffeqarsinnaatitaaneq sivitsorneqassaaq.
 Taamaammat sulisup sulisitsisuni meeqqap unitsinneqarnera pillugu nalunaarfigissavaa sulisup unitsitsineq ilisimalerpagu kiisalu meeqqap angerlartinneqarnera sulinngiffeqarnerullu sivitsornissaa ilanngullugit ilisimatitsissutigissallugit.  Sulinngiffeqarnerup sivitsorneqannginnerani uppernarsaammik pissarseqqaartoqassaaq. 

Sulisoq angajoqqaaqatimi sulinngiffeqarsinnaatitaaneranik atuilersoq sulisitsisuminut nalunaaruteqassaaq sulinngiffeqarsinnaatitaanermik atuilerluni kiisalu erninermi sulinngiffiup sivisussusaa ilanngullugu ilisimatitsissutigissallugu.   Nalunaaruteqarneq piaarnerpaamik pissaaq.

Meeqqanik tigusinermut atatillugu ilaqutariit paarsisartut sulinngiffeqarsinnaatitaanerat

Meeraq ilaqutariinnut paarsisartunut inissinneqarpat kommunalbestyrelsi aalajangiisinnaavoq angajoqqaarsianngortut arlaat ataaseq meeqqamik tigusinerminni sulinngiffeqartinnissaanut tunngasumik. 

Meeravissiartaarnermi sulinngiffeqarallarnerit sulinngitsoorsinnaanerillu

Meeravissiartaartut meeqqamik nunatsinni najugalimmik aallertut meeqqap tigunissaa sioqqullugu sapaatip akunnerani ataatsimi sulinngitsoorfeqarsinnaatitaapput.

Meeravissiartaartut meeqqamik nunatta avataani najugalimmik aallertut meeqqap tigunissaa sioqqullugu sapaatit akunnerini pingasuni sulinngitsoorfeqarsinnaatitaapput.

Aalajangersakkakkut meeravissiartaartussat meeqqami imaluunniit meeqqanik taakku sumiiffiannut aallernissaannut periarfissiisoqarpoq.   Aalajangersakkakkut aamma periarfissiisoqarpoq meeravissiartaartussat meeraq imaluunniit meeqqat tigunnginnerini peqatigeqqaarsinnaanissaannut, taamaalilluni meeraq imaluunniit meeqqat meeravissiartaartunut tigusinnginnerini meeqqat taakkununnga atassuteqalerniassammata. 

Meeraq tiguneqartutut naatsorsuunneqassaaq meeraq meeravissiartaartunut paarisassanngorlugu tunniunneqarpat. 

Meeravissiartaartut meeqqami tigusinerannut atatillugu meeqqamik ataatsimik tigusinerminni sapaatit akunnerini 15-ini suliffeqarallarnissamut pisinnaatitaapput.  Meeravissiartaartut meeqqanik marlunnit amerlanerusunilluunniit tigusinerminni sapaatit akunnerini 19-ini sulinngiffeqarsinnaatitaapput.

Meeravissiartaartut sapaatit akunnerini tulleriinneri malillugit 15-ini 19-iniluunniit sapaatit akunnerini pingasuni ataatsikkut sulinngiffeqarallarsinnaatitaapput.  Sapaatit akunneri sinneruttut meeravissiartaartut taamaallaat ataasiakkaarlutik atorsinnaavaat. Meeravissiartaartut sapaatit akunneri namminneq agguataarlugit aaqqissavaat.

Meeravissiartaartut ilisarisimariikkaminnik meeravissiartaarneranni kommunalbestyrelsi sulinngiffeqarallarnissaannut tunngasumik aalajangiisinnaapput. 

Meerartaarnermut atatillugu sulinngiffeqarnissamut takussutissaq

• Tamakkiisumik akissarsiaqarluni sapaatit akunnerisa amerlassusaat

Sulinermut isumaqatigiissutit ilaanni sulisut sulinermut isumaqatigiissutini assigiinngitsuni pisinnaatitaapput naartunermi, erninermi meeravissiartaarnermullu atatillugu akissarsiatik pigiinnarlugit sulinngiffeqarsinnaatitaallutik. 

Skemami qulaani takuneqarsinnaapput sapaatit akunnerisa amerlassusaat meerartaarnermi sulisup akissarsiaqaannarluni sulinngiffeqarsinnaaneri.

Sulisup sapaatit akunnerini akissarsiani pigiinnarsinnaanngikkunigit sulisup kommunimut erninermi ullormusianik qinnuteqarsinnaavoq.