Sulinngiffeqarallarneq (aamma sulinngikkallarnermik taaneqartartoq) tassaavoq atorfinitsiffiusimasup iluani atorfimmut appakaateqqissinnaalluni piffissami killeqartumi suliffimmiit sulinngikkallarneq. Akissarsiortoq sulinngikkallarnissamut piumasaqarsinnaanngilaq, kisiannili tamanna qinnutigisinnaallugu. Aallaaviatigut akissarsiaqarnani sulinngikkallartoqarsinnaavoq. Tamatumunngali immikkut pissutissaqarpat akissarsiortup akissarsiaqartinnissaanik sulisitsisoq aalajangiisinnaalluni.

Tamanna assersuutigalugu sulinngikkallarnissaq pillugu isumaqatigiissutigineqarsinnaavoq, akissarsiortoq:

• aappani ilagalugu nunanut allanut angalassappat,
• sulisitsisumi allami atorfimmiikkallarluni sulissappat,
• meeraq napparsimaruloortoq paarissappagu,
• inuiaqatigiinnik sullissineq pillugu malittarisassat naapertorlugit suliassamik isumaginnissappat.

Taakku assersuutaannaapput, tassa akissarsiortup sulinngiffeqarallarnissamik kissaateqarneranut pissutaasut assigiinngitsut arlaliusinnaammata. Sulinngiffeqarallarnissamut akissarsiortup peqqutigisaa sulisitsisup susassarinngilaa. Akissarsiortup sulinngiffeqarallartinnissaanut isumalluutitigut akissaqarnerluni sulisitsisoq taamaallaat naliliissaaq.

Akissarsiortoq sulinngiffeqarallarnermi nalaani aallaaviatigut atorfinitsinneqarnermi inatsisitigut pineqartup sulineratullu inissisimassaaq. Tamanna assersuutigalugu isumaqarpoq tamatumunnga kinaassusersiunngitsunik pissutissaqarpat akissarsiortoq soraarsinneqarsinnaasoq.

Tjenestemandit aamma isumaqatigiissutit naapertorlugit atorfeqartut akornanni immikkoortitsisoqarpoq.

Isumaqatigiissutit naapertorlugit atorfeqartut

Isumaqatigiissutit naapertorlugit atorfeqartunut akissarsiaqarluni imaluunniit akissarsiaqarnani sulinngiffeqarallarnissamut tunngavigisaq isumaqatigiissummi pineqartumiippoq. Sulinngiffeqarallarnissaq pillugu qinnuteqaat atorfinitsitsisunit suliarineqarlunilu aalajangiiffigineqassaaq. Akissarsiortoq taassumalu sulisitsisua sulinngiffeqarallarnissaq pillugu taamaattumik isumaqatigiissuteqarsinnaapput, aamma akissarsiortoq sulinngiffeqarallarnermini akissarsiaqassanersoq. Aallaaviatigut sulinngiffeqarallarnermi akissarsiaqartitsisoqarneq ajorpoq.

Sulinngiffeqarallarnissaq pillugu noqqaaneq itigartinneqarpat peqataasunik tusarniaaneq pillugu ingerlatsinermi inatsisini malittarisassat allakkatigullu tunngavilersuutit qimerloorneqassapput.

Tjenestemandit

Tunngaviatigut tjenestemandit tamarmik ukiut qassit sulisimaneq, atorfik suliassallu apeqqutaatinnagit sulinngiffeqarallarnissamut periarfissaqarput. Akissarsiaqarnani sulinngiffeqarallarnissaq, imaluunniit tamakkiisumik ilaannakuusumilluunniit akissarsiaqarluni sulinngiffeqarallarnissaq pillugu sulisitsisoq tjenestemandilu isumaqatigiissuteqarsinnaapput kiisalu qanoq sivisutigisumik akissarsiaqarsimanermik katersinissaq pillugu, tak. Tjenestemandit pillugit inatsimmi § 54. Aallaaviusoq erseqqissoq tassaavoq akissarsiaqarnani sulinngiffeqarallarneq.

Tjenestemandip akissarsiaqartillugu aamma qanoq sivisutigisumik akissarsiaqarsimanermik katersinissamik annaasaqartinnagu sulinngiffeqarallartinnissaanut sulisitsisoq periarfissaqarpoq, sulisitsisumit akilerneqartumik tjenestemandip ilinniarnissaa siunertarineqarpat, tak. Tjenestemandit pillugit isumaqatigiissut § 55. Isumaqatigiissummi piumasarineqarsinnaavoq tjenestemandi siumoortumik ilinniareernerup kingorna piffissami aalajangersimasumi sulisitsisumi sulinissaanut pisussaaffilerneqassasoq. Isumaqatigiissummi piumasaqaat eqqortinneqanngippat ilinniartitaanermi aningaasartuutit piffissamilu ilinniarfiusumi akissarsiat utertillugit akilerneqarnissaat sulisitsisumit piumasarineqarsinnaapput.