Feeria pillugu nalinginnaasut

Kikkut tamarmik ulluni 25-ini feeriarnissamut pisinnaatitaaffeqarput. Tamanna atuuppoq atorfeqartoq akissarsiaqarluni feeriarnissamut pisinnaatitaaneq apeqqutaatinnagu. Akissarsiaqarluni feeriarsinnaatitaanerup aamma akissarsiaqarnani feeriarsinnaatitaanerup akornanni aamma qaammammusiaqartut akunnermusiaqartullu akornanni immikkoortitsinissaq pingaaruteqarpoq.

Feeria pillugu inatsisip paasineqarnissaanut taaguutit taakku pingaaruteqarput:

• Ukioq katersuiffiusoq tassaavoq ukioq ilivitsoq
• Ukioq feeriarfiusoq tassaavoq ukiup katersuiffiusup tullia ukioq, februaarip aallaqqaataaniit 31. januaarimut ingerlasoq
• Piffissaq feeriarfiusoq. Feeriarfiusoq pingaarneq aallaaviatigut piffissami tassaniissaaq, piffissalli taassuma avataani feeriarnissaq akuerineqarsinnaalluni.

Qaammammusiallit

Feeria ukiumi ilivitsumi katersorneqassaaq. Ukioq ilivitsumi sapaatip akunneranut akunnerni 40-ini sapaatip akunnerani sulinerami feeriatiiminut 200-inut pisinnaatitsipput, tassa ullut suliffiusut 25-it imaluunniit sapaatit akunneri suliffiusut tallimat. Feeria ukiumi tulliuttumi ukiumi feeriarfiusumi ingerlanneqassaaq.

Qaammammusiaqartoq sapaatit akunnerinik tallimanik feeriarsinnaatitaanermik katersisimanngippat sapaatit akunnerinik tallimanik feeriarsinnaaneq anguniarlugu feeriassaq qanoq ilaneqarsinnaanersoq aqutsisumik tamanna isumaqatigiissutigineqarsinnaavoq. Qaammammusiaqartoq taanna assersuutigalugu sapaatit akunnerinik pingasunik katersisimappat sapaatit akunnerini tallimani feeriarnissaq pisinnaassaaq, sapaatit akunneri siulliit pingasut akissarsiaqarluni feeriarnerulluni, sinnerilu sapaatit akunneri marluk akissarsiaqarnani feeriarnerulluni.

Feeria qanoq ilinerani ingerlanneqassanersoq tamatigut aqutsisumik isumaqatigiissutigineqassaaq. Qaammammusiaqartoq piffissami feeriarfiusumi februaarip aallaqqaataaniit septembarip 30-ianut sivikinnerpaamik sapaatit akunnerini ataqatigiissuni (pingaarnertut feeria) pisinnaatitaaffeqarpoq. Feeriassat sinneruttut piffissap feeriarfiusussap avataani sivikinnerpaamik sapaatip akunneranik ataqatigiissumik ingerlanneqarsinnaapput. Nalunaaquttap akunneri sulinngiffeqarfissat sinneruttut nalunaaquttap akunnerisut ataasiakkaatut sulinngiffeqarfigitinneqarsinnaapput, taamaattoq minnerpaamik ullukkaartutut annertussusilerlugit. Pingaarnertut feeriarfissaq qaqugumut inissinneqassasoq sulisitsisoq aalajangiippat sapinngisamik siusinnerpaamik feeriarnissallu aallartinnissaa kingusinnerpaamik qaammatit pingasut sioqqullugit tamanna pillugu akissarsiaqartumut nalunaarutigissavaa. Sulisitsisunili ileqquuvoq akissarsiaqartup feeriassaa aqutsisup sulisullu akornanni suleqatigiinnikkut inissinneqartarnera.

Qaammammusiaqartoq feeriap_aallartinnissaa_sioqqullugu napparsimalerpat feeriap aallartinnissaanut pisussaatitaanngilaq. Qaammammusiaqartorli taanna feeriap_nalaani_napparsimalerpat feeriap taartissaanut pisinnaatitaaffeqanngilaq, nappaat sivikinnerpaamik feeriatiimini 40-nik sivisussuseqarsimanngippat nakorsallu nalunaarutaasigut uppernarsarneqarsinnaappat.

Immikkut feeriarnissamut ajunngitsorsiassat

Qaammammusiaqartoq immikkut feeriarnissamut ajunngitsorsiassanik katersisarpoq. Immikkut feeriarnissamut ajunngitsorsiassat tassaapput ukiumi katersuiffiusumi isertitarineqartut akissarsiat 1,5%-ii, aamma februaarip aallaqqaataani tunniunneqartarlutik.

Feeriarnissamut ajunngitsorsiassat kinguartitat

Qaammammusiaqarluni akissarsiaqartoq aamma feeriarnissamut ajunngitsorsiassaqarnissamut periarfissaqarpoq. Qaammammusiaqartoq akissarsiaqarluni feeriarnissamut taarsiullugu feeriarnissamut ajunngitsorsiassat toqqarpagit taakku taaguuteqarput feeriarnissamut ajunngitsorsiassat kinguartitat. Feeriarnissamut ajunngitsorsiassat kinguartitat isumaqarput feeriareernerup kingorna feeriarnissamut ajunngitsorsiassanik akissarsiaqartup akilerneqarnera, akissarsiaqarluni feeriarnermut taarsiullugit.

Akissarsiaqartoq feeriarnissamut ajunngitsorsiassat kinguartinnissaat kissaatigippagit ukioq katersuiffiusoq sioqqullugu kingusinnerpaamik oktobarip aallaqqaataani tamanna pillugu sulisitsisumut ilisimatitsinissaa pingaarpoq. Feeriarnissamut ajunngitsorsiassat taamaalilluni feeriareernerup kingorna ingerlaannartumik tunniunneqassallutik.

Feeriarnissamut ajunngitsorsiassat kinguartitani akissarsiat 12 %-iannik sulisitsisoq feeriarnissamut ajunngitsorsiassaqartitsissaaq. Akissarsiallilli feeriarnissamut immikkut ajunngitsorsiassanut pisinnaatitaaffini annaassallugu.

Soraarneq

Atorfeqartoq atorfimminit soraarpat allamilu atorfimmi nutaami atorfinippat, atorfeqartoq akissarsiaqarluni feeriarnissaminut suli pisinnaatitaaffeqassaaq. Feeriaqarnersiutit taakku sulisitsisorisamit tiguneqarnissaannut sulisitsisoq nutaaq feeriartoqarneranut uppernarsaassaaq. Feeriartoqarneranik uppernarsaatip feeriartoqarnera uppernarsarpaa.

• Atorfeqartoq assersuutigalugu 2018 tamakkerlugu ulloq naallugu sulisarsimappat 2019-imi feeriaqarnersiuteqarluni imaluunniit akissarsiaqarluni sapaatit akunnerini tallimani feeriarsinnaanermik katersisimassaaq. Atorfeqartorli ulloq 1. august 2019-imi allami suliffeqalerpat aamma siusinnerusukkut sulisitsisorisamini sapaatit akunnerini pingasuni feeriareersimalluni, atorfeqartoq 2019-imi suli sapaatit akunnerini marlunni feeriarsinnaatitaavoq, siusinnerusukkut sulisitsisorisimasamit akilerneqartussaq.
  
  

Atorfeqartoq atorfimminit soraarpat nunanullu allanut, Danmarkimi imaluunniit Savalimmiunut nuuppat feeriarnissaq akilerneqassaaq. 

Akunnermusiaqartut

Akunnermusiaqartut tamarmik sapaatit akunnerini tallimani akissarsiaqarnatik feeriarsinnaatitaapput. Akunnermusiaqartut akissarsiaqarlutik feeriarnissamut pisinnaatitaaffeqanngillat, akerlianilli feeriarnissamut ajunngitsorsiassanut pisinnaatitaaffeqarlutik.

Feeriarnissamut ajunngitsorsiassat tassaapput akissarsiat 12 %-ii ingerlaavartumillu katersorneqartarlutik. Feeriarnissamut ajunngitsorsiassat sulisitsisumi aningaasanik katersuiffiusumi qinnuteqartoqarneratigut feeriap aallartinnissaa sioqqutilaarlugu akilerneqassapput.

Soraarneq

Akunnermusiaqartoq atorfimminit soraarpat allamilu akunnermusiaqarluni atorfimmi nutaami aallartippat, feeriarnissamut ajunngitsorsiassat ukiup feeriarfiusup naanerani akilerneqassapput. Atorfeqartoq taava siusinnerusukkut aamma nutaami sulisitsisumi feeriarnissamut ajunngitsorsiassanik qinnuteqassaaq.

Akunnermusiaqartoq atorfimminit soraarpat aamma atorfimmi nutaami qaammammusiaqartutut aallartippat, ukiup feeriarfiusup naanerani feeriarnissamut ajunngitsorsiassat akilerneqassapput, sulisitsisumi aningaasanik katersuiffiusimasumi qinnuteqartoqarneratigut. Qaammammusiaqartut atorfik nutaaq aallartinneqarpat "Qaammammusiaqartuni" aallaaserineqartut feeriassat katersorneqassapput.