Akissarsiortoq atorfeqarnermi nalaani sulinissamut pisussaaffiup naammassineqarnissaanik tunniussinissaminut pisussaatitaavoq. Taanna tunniunneqanngippat tassani sumiginnaaneq pineqarpoq. Sulinnginnermi tamanna atorfinitsitaanermi pissutsinik annertuumik sumiginnaanerulersinnaavoq.

Taamaattorli suliffimmut takkutinngitsoornerit tamarmik isumaqatigiissummik sumiginnaaneruneq ajorput, tassa sulinngiffeqarneq, napparsimaneq aamma meerartaarneq assigisaalu pissutigalugit takkutinngitsoorneq pissutissaqarluni takkutiginngitsoornerusarmata.

Atorfilittut napparsimanerpit nalaani akissarsiaqarnissannut pisinnaatitaaffeqarputit. Atorfillit pillugit inatsimmi § 7 ima oqaasertaqarpoq: “Atorfilik nappaammik pissuteqartumik suliamik isumaginnissinnaanngippat, taassuma malitsigisaanik sulinngitsoorneq malittarisassanik unioqqutitsinnginnertut isigineqassaaq, tassa atorfilik atorfeqarnermi nalaani siunertarinngisamik imaluunniit mianersuaalliungaatsiarnikkut napparsimalersimanngippat imaluunniit atorfinitsinneqarnermini eqqunngitsuliorluni nappaatigisamik oqaatiginnissimanngippat.

Akissarsiortoq atorfillit pillugit inatsimmi pineqartunut ilaavoq, piumasaqaatit tulliuttut naammassineqarsimappata:

• Sulineq atorfillit suliassaannik suliassaqarfiuneruppat
• Akissarsiortoq 18-t sinnerlugit ukioqarpat
• Akissarsiortoq sapaatip akunneranut agguaqatigiissillugu akunnerit 15-it sinnerlugit sulisarpat

Atorfillit pillugit inatsimmi pineqartunut ilaanerluni qularutigineqarpat, taava atorfillit pillugit inatsit akissarsiortumit atuarneqarsinnaavoq tamatumalu kingorna suli qularuteqarani aqutsisuminut imaluunniit kattuffimminut saaffiginnissinnaavoq.

Isumaqatigiissutit aamma innersuussutigisinnaasarpaat, atorfillit pillugit inatsimmi napparsimaneq pillugu malittarisassat atuutsinneqassasut. Taamaammat Aningaasaqarnermut Sulisoqarnermullu Aqutsisoqarfiup innersuussutigaa, isumaqatigiissut imminermut tunngasoq atuarneqassasoq.

Napparsimaneq

Akissarsiortoq taamaallaat suliamik isumaginnissinnaanngikkuni napparsimalluni nalunaartariaqarpoq. Napparsimaneq sulisinnaassutsimut sunniuteqanngitsoq akuerineqarsinnaanngilaq.

Taamaallaat akissarsiortup nammineq nappaatigisaa akuerineqarsinnaavoq. Allat nappaataat tunngaviusumik pingaarnertut isumaqanngilaq.

Aqutsisup sulisoq napparsimalluni nalunaarsimasoq qinnuigisinnaavaa ullut napparsimaffiusut 4-nit nakorsap allagarsiussaanik tunniussissasoq. Pasitsaassinermik patsiseqartoqarpat, aqutsisoq aamma ullormi napparsimaffiusumi siullermi nakorsap allagarsiussaanik qinnuteqarsinnaavoq.

Sulisitsisup sulisoq nakorsap allagarsiussaanik tunniusseqqusimappagu, sulisitsisup taanna akilissavaa.

Ullut 120-t malittarisassat

Ulluni 120-ni napparsimanermi malittarisassaq sulisup aamma sulisitsisup akornanni isumaqatigiissutigineqarsimappat, sulisitsisup sulisoq sivikillisakkamik kalerriilluni soraarsissinnaavaa. Atorfeqartitsinerni ataasiakkaani allaganngorlugu isumaqatigiissusiornikkut aalajangersarneqarsinnaavoq, sulisup qaammatip naanerani soraarnissaanut qaammat ataaseq sioqqullugu soraarnissaanik kalerriisoqarsinnaasoq.

Ulluni 120-ni napparsimanermi malittarisassaq atorneqassappat, sulisoq qaammatini tulleriiginnarni 12-ni ulluni 120-ni napparsimasimassaaq, aamma sulisoq suli napparsimassaaq. Qaammatisiutip ullui 120-t pineqarput. Soraarsitsineq ullut 120-it naanerinut atassaaq. Pisortani atorfeqaraanni soraarsitsineq pillugu aalajangiineq ullunut 120-nut attuumassuteqartillugu nalunaarutigineqassaaq. Tassa imaappoq, tamanna sioqqullugu illuatungerisamik tusarniaaneq pissaaq.

Ullut napparsimaffiusut ataqatigiittariaqanngillat, ullulli 365-it ingerlaneranni pissallutik. Napparsimanerit sulisilluni ajoqusernermik nalunaarutigineqarsimasumik pissuteqartut ullunut 120-nut taakkununnga ilaatinneqanngillat. Ernineq pillugu inatsimmi § 7-imi, imm. 3-mi aamma 4-mi eqqaaneqartunik peqquteqarluni peqannginneq aamma ullunut 120-nut ilaatinneqassanngilaq.

Ullut 120-t malittarisassat atorfininnermi isumaqatigiissummi allanneqassapput. Aalajangersagaq ataatsimoorussamik isumaqatigiissutinut isumaqatigiissutigineqarsinnaanngilaq, kisianni ataatsimoorussamik isumaqatigiissutini isumaqatigiissutigineqarsinnaavoq, malittarisassaq atorneqassanngitsoq. Tassa imaappoq, sulisup isumaqatigiissutaani allaqqappat, ullut 120-t malittarisassat atorneqassanngitsoq, taava malittarisassaq sulisup atorfinitsinneqarnermi isumaqatigiissutaani allanneqarsinnaanngilaq.

Ullut 120-t malittarisassat atuutsinnagit soraarsitsineq

Sulisitsisup sulisoq napparsimanerata nalaani soraarsissinnaavaa, naak atorfinitsinneqarnermi isumaqatigiissutini ullut 120-t malittarisassat isumaqatigiissutigineqarsimanngikkaluartut. Soraarsitsineq taamak ittoq pisinnaavoq, pissusiviusunik tunngavissaqartoqarpat. Imaassinnaavoq, suliffeqarfiup ingerlatsinerata sulisup annertuumik peqanngittarnera sulilu peqannginnera nammassinnaanngikkaa.

Soraarsitsineq taamak ittoq sulisut ataasiakkaat soraarsitaanissamik kalerriutaat atorlugu pisinnaavoq: https://www.asa.gl/Page?PageId=981095259