Meeqqap napparsimaffia ulloq siulleq

Sulisoq meeqqamik napparsimasoortitsinissamut periarfissaqarneranut sulisup isumaqatigiissutaa aalajangiisuuvoq.

Periarfissaq isumaqatigiissummi eqqaaneqarsimappat meeqqamik napparsimasumik paarsinissamut allatigullu paarsisussamik nassaarnissamut sulisoq sulinngiffeqarnissaminut periarfissaqarpoq.

Ullormi siullermi meeqqamik napparsimasoortitsinissamut isumaqatigiissut periarfissiippat piumasaqaatit uku naammassineqarsimassapput:

• Ulloq taanna tassaavoq meeqqap napparsimaffigisaa siulleq
  • Meeraq assersuutigalugu sapaatikkut napparsimalersimappat sulilu ataasinngornikkut ullaakkut napparsimalluni taava sulisoq meeqqaminik ullormi siullermi napparsimatitsisinnaanngilaq, tassa meeqqap napparsimaffia ulloq siulleq sapaataammat.
• Meeqqap atugai pissutigalugit pisariaqartitsilerneq
  • Tamatumunnga pingaaruteqartoq ilaatigut tassaavoq meeqqap ukiui kiisalu nappaat. Meeraq utoqqaaneruppat taava sulisup angerlarsimaannarnissaanut meeqqamillu paarsinissaanut pisariaqartut annertunerussapput.
• Suliffimmi pissutsit tamanna ajornartinngippassuk
• Meeraq angerlarsimappat

Sulisup meeqqaminik ullormi siullermi napparsimasoortitsinissaa taamaalilluni pisinnaatitaaffiunngilaq. Suliffimmi pissutsit pissutigalugit sulisoq pinngitsoorneqarsinnaanngippat sulisitsisoq itigartitsisinnaavoq. Aaqqissuussineq sulisumit atornerlunneqarpat sulisumut ataatsimut aaqqissuussineq sulisitsisumit atorunnaarsinneqarsinnaavoq.

Sulisoq isumaqatigiissutini malillugu meeqqap napparsimanerani ullormut siullermut pisinnaatitaaffeqanngippat meeqqap napparsimanera pissutigalugu sulisoq takkutinngitsoorpat akissarsiaanik ilanngaassinissamut sulisitsisoq pisinnaatitaaffeqarpoq.

Meeqqap napparsimanerani aamma/imaluunniit unitsitaanerani sulinngiffeqarallarneq

Meeqqap unitsitaaneranut atatillugu sulisup sulinngiffeqarallarsinnaaneranut sulisup isumaqatigiissutaa aalajangiisuuvoq.

Meeqqap 0-imiit 16-inut ukiullip illoqarfigisami imaluunniit illoqarfigisap avataani peqqinnissaqarfiup akiligaanik ingiallortitut aamma/imaluunniit meeqqap uninneranut atatillugu angalaqataanermut atatillugu napparsimmavimmut uninnganermut atatillugu ullut 12-it angullugit akissarsianik ilanngaatsinnani sulinngiffeqartoqarsinnaavoq.

Meeqqap unitsitaanera angajoqqaallu unitseqataanerat kiisalu ingiagaqataanerat uppernarsarneqassapput.

Sulisoq akissarsiaqarluni imaluunniit akissarsiaqarnani sulinngiffeqarallarnissamut pisinnaatitaaffeqarnersoq apeqqutaatinnagu sapinngisamik piffissaagallartillugu sulisitsisumit nalunaaruteqarnissaq pingaaruteqarpoq.