Napparsimalluni nalunaartarneq

Napparsimalluni qanoq eqqortumik nalunaartoqartarnissaanik sulisut tamarmik ilisimaarinnissaat sulisitsisup akisussaaffigaa. Taamaattumik sulisitsisoq napparsimalluni sulinngitsoortarneq pillugu politikkiliortariaqarpoq, tullinnguuttunik minnerpaamik allassimasoqassalluni:

• Sulisoq napparsimalluni kimut nalunaassava? Siullertut aappaatullu salliutitsineq.
• Napparsimalluni qanoq nalunaartoqassava?
• Napparsimalluni kingusinnerpaamik qaqugukkut nalunaartoqassava?

Sulisoq nalunaarnermini nappaatip suuneranik paasissutissiinissamik pisussaaffeqanngilaq. Sulisitsisoq taamatuttaaq sulisup sumik ajoquteqarneranik apereqqusaanngilaq.

Sulisitsisup aallaaviatigut sulisup ullut sisamassaani napparsimanerani nakorsamit uppernarsaateqarnissaa qinnuigisinnaavaa. Napparsimalluni sulinngitsuukulaarnermi qaqutikkut ullormi siullermi napparsimanermi nakorsamit uppernarsaammik qinnuiginnittoqarsinnaavoq.

Sulisitsisup sulisup nakorsamit uppernarsaateqarnissaanik qinnuigiguniuk, sulisup nakorsamit uppernarsaammik pissarsiniarnerani aningaasartuutigisimasaanik taarsiissaaq (nakorsiarnermi assartuutinut aningaasartuutaajunnartut pinnagit).

Napparsimalluni sulinngitsoortarneq pillugu oqaloqatigiinneq

Sulisup tapersersornissaa kiisalu suliffeqarfiup ingerlaannarnissaa ingerlaannarneratalu qulakkeernissaa napparsimalluni sulinngitsoortarneq pillugu oqaloqatigiinnermi siunertaavoq. Napparsimalluni sulinngitsoortarneq pillugu oqaloqatigiinneq sulisup napparsimalluni sulinngitsoortarneranik annikillisitseqataasarpoq suliffeqarfimmillu avatangiisimik pitsaasumik peqqinnartumillu kinguneqartarluni.

Napparsimalluni sulinngitsoortarneq pillugu oqaloqatigiinneq atorfeqarnermut tunngatillugu oqaloqatigiinnerunngitsoq oqaatigissallugu pingaaruteqarpoq. Napparsimalluni sulinngitsoortarneq pillugu oqaloqatigiinneq eqqissisimasumik pitsaasumillu ingerlanneqassaaq. Napparsimalluni sulinngitsoortarneq ingerlatsinermut sunniuteqartartoq napparsimallunilu sulinngitsuukulasoqarnera ingerlatsinermit nammanneqarsinnaannginnera pissutigalugu sulisitsisoq sulisumik soraarsitsisariaqalerneranik kinguneqarsinnaasoq napparsimalluni sulinngitsoortarneq pillugu oqaloqatigiinnermi oqaatigineqartariaqarput.

Sulisitsisup napparsimalluni sulinngitsoortarneq pillugu oqaloqateqarnissani kissaatigiguniuk sulisitsisup ataatsimiigiaqqussut kingusinnerpaamik ullut marluk-pingasut sioqqullugit sulisumut tunniutissavaa. Napparsimalluni sulinngitsoortarneq pillugu oqaloqatigiinneq suliffeqarfimmi sulisulluunniit napparsimajunnaarnerani pinissaa piumasaqaataanngilaq.

Ataatsimiigiaqqussut minnerpaamik makkuninnga imaqassaaq:

• Qaqugu ataatsimiinneq pissava?
• Ataatsimiinneq sumi ingerlanneqassava?
• Kikkut ataatsimeeqataassappat?
• Ullormut oqaluuserisassat ataatsimiinnermi sammineqartussat assersuutigalugu ukununnga tunngasinnaapput:
  • Sulisup napparsimalluni sulinngitsoortarnerata kisitsisitigut paasissutissartai (sulinngitsoortarneq procentinngorlugu sulinngitsoortarnerillu akulikissusaat).
  • Ingerlatsinermut tamanna qanoq sunniuteqartarnersoq.
  • Sulisitsisoq sulisup napparsimalluni sulinngitsoortarneranik annikillisaaniarluni qanoq iliorsinnaava?
  • Siunissami iliuusissatut pilersaarutip oqallisiginera.
• Illersuisoqarnissamik kaammattuuteqarneq oqaloqatigiinnermullu takkuttussaatitaanermillu nalunaaruteqarneq.

Napparsimalluni sulinngitsoortarneq pillugu oqaloqateqarnerup kingorna imaqarniliortoqassaaq, taannalu sulisup atuaqqissaagassaatut oqaaseqarfigisassaatullu nassiunneqassaaq. Atuaqqissaarneqareerpat akuerineqareerpallu suliamut sulisumut tunngasumut toqqorneqassaaq.