Immikkut siunnersortinik toqqaaneq

Isumaqatigiissutit tullinnguuttut makku naapertorlugit immikkut siunnersortinik toqqaasoqarsinnaavoq:

• DSA-mik isumaqatigiissut, immikkut siunnersortinik siunnersortillu pisortaat pillugit akissarsiat atorfinitsitsinermilu piumasaqaatit pillugit tapiliussaq
• Djøf-mik isumaqatigiissut, Namminersorlutik Oqartussani Kommuninilu immikkut siunnersortinut tapit pillugit tapiliussaq
• AK-mi atorfilinnik isumaqatigiissummi 13

Matuma qulaani isumaqatigiissutit naapertorlugit immikkut siunnersortimik toqqaasoqassappat tamanna Aningaasaqarnermut Sulisoqarnermullu Aqutsisoqarfimmit akuerineqaqqaartariaqarpoq. Taamaattumik pingaaruteqarpoq illit aqutsisutut sulisoq piffissami aalajangersimasumi immikkut siunnersortinngornissaanut neriorsunnginnissaa, tamannami aalajangersimasumik naliliinermi aamma piginnaasanik atorfimmilu atorfigineqartut ataasiakkaarlugit nalilersuinermi pisarmat.

Immikkut siunnersortitut atorfeqareersumik toqqaaneq atorfiup inuttassarsiuunnissaanut pisariaqartitsinngilaq.

Immikkut siunnersortimik toqqaanissamut piumasaqaatit

Immikkut siunnersortitut toqqaasoqassappat sulisoq sulianik qaffasissumik ilisimasaqarnissaa immikkullu ilisimasaqarnissaa piumasaqaataavoq. Immikkut ilisimasat aamma sulianik qaffasissumik ilisimasaqarnissaq taaneqartoq suliassaqarfimmi sulisup atorfimmini suliarisassaaniinnissaat oqaatigissallugu pingaaruteqarpoq. Qinnuteqartoq nalinginnaasumik suliassaqarfimmi sivikinnerpaamik ukiuni pingasuni sulisuusimanissaa immikkullu ilisimasaqalersimanissaa, tassa immikkut siunnersortitut toqqarneqassagaanni, piumasaqaataasoq Aningaasaqarnermut Sulisoqarnermullu Aqutsisoqarfimmi nalilerneqarpoq.

Immikkut ilisimasalerujussuunissap sulianillu ilisimasaqarluarnissap saniatigut atorfiup imarisaanut aamma immikkut ittunik piumasaqaateqartoqarpoq. Qinnuteqaat makkuninnga imaqassaaq:

• Suliassanik immikkut pitsaalluinnartunik isumaginninnerit
  • Tassunga ilanngullugu aalajangiisinnaanermut piginnaaneqassaaq
• Suliassaqarfinni tamani akuttunngitsumik ataqatigiissaarisarnerit
  • Assersuutigalugu suliniutinik aqutsinerit
• Suliassat aqutsisunut tunngasut
  • Matumani ilanngullugit siunnersuineq kiisalu aqutsisunut qutsinnerusunut suliassanut nassuiaasiorneq ineriartortitsinerlu.

Immikkut siunnersortinik akissaasersuinerit

Sulisoq DSA-mik isumaqatigiissut naapertorlugu immikkut siunnersortitut toqqarneqarsimappat taava immikkut siunnersortitut taaguuteqalissaaq atorfimmut aamma immikkut siunnersortitut tapit qaammammut 4.713,40 kr.-t ilanngunneqartarput (ukiumut 56.560,08 kr.). Isumaqatigiissummi § 6 naapertorlugu sulisoq immikkut atorfeqarnermini tapisiaqareersimappat, taava tapisiaq taanna peerneqassaaq. 

Sulisoq Djøf-mik isumaqatigiissut naapertorlugu immikkut siunnersortitut toqqarneqarpat atorfimmut immikkut siunnersortitut taaguuteqalissaaq aamma immikkut siunnersortinut tapit qaammammut 4.548,33 kr.-t ilaatinneqarput (ukiumut 54.580,00 kr.). Isumaqatigiissummi § 6 naapertorlugu sulisoq immikkut atorfeqarnermini tapisiaqareersimappat, taava tapisiaq taanna peerneqassaaq. 

Sulisoq AK-Atorfillit pillugit isumaqatigiissut naapertorlugu immikkut siunnersortitut toqqarneqarpat immikkut siunnersortitut taaguuteqalissaaq, atorfimmut aamma immikkut siunnersortitut tapit qaammammut 3.483,33 kr.-t ilaatinneqarput (ukiumut 41.800,00 kr.). Isumaqatigiissummi § 16 naapertorlugu sulisoq immikkut atorfeqarnermini tapisiaqareersimappat, taava tapisiaq taanna peerneqassaaq. 

Inummut tapit

DSA-mik isumaqatigiissut, immikkut siunnersortit aamma siunnersortit pisortaat pillugit akissarsiat atorfinitsitsinermilu piumasaqaatit pillugit tapiliussaq, § 3, imm. 4-mi immikkut ittumik pisoqartillugu immikkut siunnersortinut inuttut tapit isumaqatiginninniutigineqarsinnaapput. Tamanna qaqutiguinnaq atorneqartarpoq tassami tamanna inuup immikkut illuinnartumik pikkorissuseqarnissaanik piginnaaneqarnissaanillu piumasaqaatitaqarmat.

Djøf-mik isumaqatigiissut, Namminersorlutik Oqartussani Kommuninilu immikkut siunnersortinut tapit pillugit tapiliussaq, § 3, imm. 2-mi immikkut ittumik pisoqartillugu immikkut siunnersortinut inuttut tapit isumaqatiginninniutigineqarsinnaapput. Tamanna qaqutiguinnaq atorneqartarpoq tassami tamanna inuup immikkut illuinnartumik pikkorissuseqarnissaanik piginnaaneqarnissaanillu piumasaqaatitaqarmat.