Peqqusiileqisitsineq kinguaassiuutitigulluunniit peqqusiileqisitsineq

Sullivimmi atukkat peqqinnartuunissaasa isumannaatsuunissaasalu qulakkeernissaanut illit sulititsisutut akisussaasuuvutit. Sullivimmi atukkat pillugit maleruagassat ilaat uani nanisinnaavatit Kalaallit Nunaanni sullivimmi atukkat pillugit inatsimmi.

Peqqusiileqisitsineq kinguaassiuutitigulluunniit peqqusiileqisitsineq pillugit maleruagassat inatsisinit misilittakkaniillu aallaaveqarput.

Angutit arnallu naligiissitaanissaat pillugu Inatsisartut inatsisaanni nr. 3, 29. november 2013-meersumi peqqusiileqisitsineq kinguaassiuutitigulluunniit peqqusiileqisitsineq pillugit makkuninnga allasimasoqarpoq:

• 2, Imm. 2. Arnanik angutinilluunniit peqqusiileqisitsineq kinguaassiuutitigulluunniit peqqusiileqisitsineq aammattaaq inerteqqutaapput.
• 4 ''Inuup ataqqinassusiata kanngunarsarnissaanik sunniuteqartumik siunertaqartumilluunniit, aamma pineqartumut qunusaarinnerpalaartumik, akeqqersimaartumik, nikassaarpasissumik, nikanarsaarpasissumik nuanniitsumillu misigisimalersitsilluni inuup suiaassusia inuk akuttunngitsumik, naapertuutinngitsumillu pineqaraangat peqqusiileqisitsisoqartarpoq.''

Imm. 2. ''Inuup pineqartup kanngunarsarnissaanik, nikanarsarnissaanik, assigiinngisinneqarnissaanik imaluunniit nukillaarsarnissaanik sunniuteqartumik siunertaqartumilluunniit, kinguaassiuutitigut peqqusiileqisitsisoqartartoq.

Qulaani aalajangersakkamut ilaapput peqqusiileqisitsinerit kinguaassiuutitigullu peqqusiileqisitsinerit assigiinngitsut tamarmik, matumani oqaasertalikkamik, oqaasertaqanngitsumik timikkullu pissusilersuutit ilanngullugit. Ataatsimoorluni peqqusiileqisitsineq kinguaassiuutinullu attuumassuteqartumik pinngitsaaliilluni akiliisitsiniaaneq aalajangersakkamut ilaapputtaaq.

Illit sulisitsisutut sullivimmi atukkat peqqinnartuunissaasa isumannaatsuunissaasalu qulakkeernissaanut pisussaaffeqarputit, tassa imaappoq sullivimmi peqqusiileqisitsisoqarneranik kinguaassiuutitigulluunniit peqqusiileqisitsisoqarneranik tusagaqaruit iliuuseqartussaatitaasutit.

Sulisoq peqqusiileqititsiniarpalaartumik tiinganiarpalaartumilluunniit pissusilersortoqarnera pillugu saaffiginnippat, tamanna sulisumut peqqusiileqititsiniarpalaartumik pissusilersorsimasumut uparuaassutigineqassaaq. Taamatut nalunaaruteqartoqarpat sulisoqarnermut inatsisilerituut ugguuna attavigisariaqarpatit www.asa.gl/sparring, suliaq misissorniassammassuk. Suliami tassanerpiaq naapertuussorineqarpat suliap misissorneqarnerani, sulisoq peqqusiileqititsiniarsorineqartoq sulinngikkallartinneqarsinnaavoq.

Peqqusiileqisitsineq

Suliani peqqusiileqisitsinermut tunngasuni Kalaallit Nunaanni sullivimmi atukkat pillugit inatsimmik aamma arnat angutillu naligiissitaanerat pillugu inatsimmik unioqqutitsisimasoqarsinnaavoq, ingasalluinnartumillu pisoqarsimatillugu Kalaallit Nunaanni Pinerluttulerinermi inatsit unioqqutinneqarsimasinnaalluni.

Namminersorlutik Oqartussat Kinguaassiutitigut peqqusiileqititsisarneq pillugu politikkeqarput, tassanilu ersarissumik allassimavoq, Namminersorlutik Oqartussat Kinguaassiutitigut peqqusiileqititsinerit suulluunniit akuerisinnaanngikkaat.

Kinguaassiutitigut peqqusiileqititsisarneq pillugu politikkimi allassimavoq illit aqutsisutut kinguaassiutitigut peqqusiileqititsisarnermik pinaveersaartitseqataasariaqartutit, tamannalu imatut piviusunngortissavat:

• Erseqqissaatigissavat kinguaassiutitigut peqqusiileqisitsisarneq akuerineqarsinnaanngitsoq
• Sulisut kinguaassiutitigut peqqusiileqisitsisarneq pillugu politikki pillugu ilisimatikkit
• Suliffimmi tarnikkut atugarisat atugarissaarnerlu sulissutigikkit
• Peqqusiileqisitsiniartoqarsimaneranik saaffiginnissutit tamaasa pimoorutikkit
• Suliat iliuuseqarfigipallattakkit malunnaarsaartumillu
• Inerniliipallannaveersaarit

Aaqqiagiinngissutit uumisaarisarnerlu

Aningaasaqarnermut Sulisoqarnermullu Aqutsisoqarfiup nittartagaani aaqqiagiinnginnerit nakkarsaanerillu pillugit sulisoqarnermut politikki nanisinnaavat. Suliffimmi aaqqiagiinngissutit tamatigut oqaloqatigiinnikkut aaqqinniarneqartariaqarput. Sulisut pisut namminneq aaqqissinnaanngippassuk, illit aqutsisutut pissutsit isumagisariaqarpatit. Pisariaqarsorineqarpat HRU sinniisulluunniit ilanngunneqarsinnaapput.

Namminersorlutik Oqartussat ikkatiginninneq pillugu nassuiaat Sullivinnik Nakkutilliisoqarfimmeersoq aallaavigalugu sulisarput:

"Ikkatiginninneq tassaavoq, inuk ataaseq inuilluunniit arlallit akulikitsumik piffissamilu sivisuumi arlaleriarlutik ingasattumillu inummut ataatsimut inunnulluunniit arlalinnut, inuup inuilluunniit arlallit ajuallaatigisatut imaluunniit nakkarsarneqaatigisatut misigisaannik pissusilersorfiginninneq. Taamaattorli inuit nakkarsarneqartut imminnut sunniutilimmik illersorsinnaanngikkaangata, nakkarsaanerit ikkatiginnittutut isigineqartarput. Qinngasaarinerit, illuatungeriinnit ajortussarsiornerunngitsutut isigineqartut, ataasiaannarlutillu pisut ikkatiginninnerunngillat."

Ikkatiginninnissamut aaqqissuussineq atorfeqartitaanermut inatsisitigut kinguneqartitsissutaasinnaavoq

Ikkatiginnittoqartillugu isumaginninnissamut siunnersuutitsialaat:

• Saaffiginnissutit tamaasa pimoorutikkit
• Pissutsit isumagikkit
• Illuatungeriit peqataasut oqaloqatigikkit
• Aaqqiissutissarsigit
• Isumaqatigiissutit atugarissaanerillu malitseqartittakkit