Isumassuinermut atugarissaarnissamullu tunngatillugu oqaloqatiginninnerit

Isumassuinermut atugarissaarnissamullu tunngatillugu oqaloqateqartarnikkut, suliffeqarfimmi atugarissaarnerunissaq anguniarlugu sulisut isumassorneqarnissaat siunertaavoq. Oqaloqatiginninnerit taakkua sulisumik ernumagisaqarnermi ingerlanneqartarput, atorfeqartitaanermut inatsisit naapertorlugit suliassaanngilaq kinguneqartitsinerunaniluunniit. Sulisup pissusilersuutaata erseqqissarneqarusuppata/aaqqiivigineqarusuppata paarlattuanik sulinermut atatillugu oqaloqatigiinnissamut aggersaasoqartariaqarpoq.

Isumassuinermut tunngatillugu oqaloqatigiinnerit napparsimalluni sulinngitsoornernut, assersuutigalugu pinngitsuuisinnaajunnaarnermik tarnikkulluunniit ajornartorsiornermi katsorsartinnissamut  il.il. pilersaarutinut tunngapput.

Atugarissaarnissamut tunngatillugu oqaloqatigiinnerit sulisup suliffimmi atugarisaanik pitsanngorsaanermut, tassunga ilanngullugit suleqatigiinnermut, immikkoortortaqarfimmi nipi atorneqartartoq, immikkoortortaqarfimmi pissusilersuutit pitsanngorsaanermut tunngapput.

Isumassuinermut atugarissaarnissamullu tunngatillugu oqaloqatiginninnerit atorneqarsinnaanerat siammasippoq, ersarissumillu nassuiaasersorneqaratik. Taamaattumik oqaloqatigiinneq qanoq taagornerissi apeqqutaanngilaq, kisiannili taassuma imarisai kiisalu sulisup qitiutinnissaanut isumassuinissaq siunertaavoq.

Illit sulititsisutut sulisut suliffimmi isumaasa nipaasalu ajortumut allanngorneri maluginiassagitit, qisuariarfigissagitit suleqatitillu oqaloqatigissagitit kaammattuutigaarput. Taamaaliornikkut sulliffimmi avatangiisit peqqinnartuunissaat aamma qulakkeerneqassaaq, napparsimanermillu nalunaarnerit sioqqullugit ilanngunneqassallutik.

Illit sulititsisutut isumassuinermut atugarissaarnissamullu tunngatillugu oqaloqatiginninniaruit ataatsimiigiaqqussummik pilersitsissaatit taannalu ataatsimiinnissaq ullunik marlunnik pingasunilluunniit sioqqullugu sulisumut nassiussimassallugu. Ataatsimiigiaqqussummi allassimassapput ataatsimiinneq sumi qaqugulu pissanersoq, oqaluuserisassat, kikkut peqataassanersut sulisullu kissaatigippagu illersortimik nassataqarsinnaasoq. Oqaloqatigiinnermut takkuttussaatitaanerup allannissaa eqqaamajuassavat.

Isumassuinermut atugarissaarnermulluunniit tunngatillugu oqaloqatigiinnerit suliffeqarfimmi pinissaat piumasaqaataanngilaq. Pissutsit aallaavigalugit pissusissamisoorsorineqarpat, sulisoq ornillugu avatangiisiniluunniit arlaannaannulluunniit attuumassuteqanngitsuni oqaloqatigiinneq ingerlanneqarsinnaavoq.

Isumassuinermut atugarissaarnissamullu tunngatillugu oqaloqatiginnermut sammisassatsialaat:

• Sulisoq nalinginnaasumik atugarissaarnersoq apeqqutigiuk
• Pissusilersuutit qanoq suliffimmut suleqatinullu sunniuteqartarnersut oqaluuserikkit
• Sulisup ajornartorsiutigisai qanoq iliuuseqarfigisinnaanerlugit illit sulisitsisutut arlaannik iliuuseqarsinnaanerlutit apeqqutigiuk
• Ajornanngippat pissutsinut iluaqutaasinnaasunik iluusissanik isumaqatigiissuteqarit

Isumassuinermut atugarissaarnissamullu tunngatillugu oqaloqatiginninnerup kingorna oqaloqatigiinnermit imaqarniliortoqartuassaaq, taannalu sulisumut nassiunneqassalluni (illersuisumullu). Oqaaseqaateqarsinnaanermut ullunik sisamanik-tallimanik periarfissiguk. Namminersorlutik Oqartussani, taakkuluunniit immikkoortortaqarfiini peqqinnissaqarfimmiluunniit aqutsisuuguit, imaqarniliaq personale@nanoq.gl-imut nassiussinnaavat, sulisoq pillugu mappemut toqqorsinnaaniassagatsigu.

Sulisoq pillugu isumaqatigiissutigineqarsimasulluuniit pillugit malitseqartitsinissat eqqaamassavat. Sulisut ajornartorsiortut eqqumaffiginissaat isumagineqarnissaallu pingaaruteqarput. Suliamut atatillugu oqaloqatigiittoqarsimatillugu allattuinissaq eqqaamasassavat.

Pingaartumik atornerluinermut atatillugu.

Qitiusumik allaffeqarfimmi Aanngajaarniutinik inerteqqutaanngitsunik inerteqqutaasunillu aammalu pinnguaatinik sulisut pinngitsuuisinnaajunnaarsimanerat pillugu politikkeqarpoq..

Aanngajaarniutinik pinnguaatinillu atornerluinikkut ajornartorsiuteqartunut isumaginninnissaq siunertaralugu politikki pilersinneqarpoq.

Sulisut atornerluinermik ajornartorsiutillit sulititsisunit tapersersorneqartuarnissaat ikiorneqartuarnissaallu Namminersorlutik Oqartussat pissusissamisoorsoraat.

Atornerluineq pillugu ajornartorsiuteqarnermik saaffiginninnerit tamarmik isertuulluinnartariaqarput. Katsorsaanissamut iliuusissatut ersarissumik pilersaarusiortoqassaaq. Katsorsaanermut aningaasartuutit immikkoortortaqarfinnit akilerneqartassapput.

Katsorsarneqarnissamut neqeroorut atorsinnaassagaanni makku naammassineqarsimassapput:

• Inuk qitiusumik allaffeqarfimmi atorfeqartuussaaq
• Inuk 18-ileereersimasuussaaq
• Inuk sivikinnerpaamik qaammatini pingasuni sulereersimassaaq
• Inuk aalajangersimasumik atorfinitsinneqarsimassaaq. Aaqqissuussamik uku eqimattat atuisinnaanngillat:
  1. Taartaasartut
  2. Sulisut, pingaarnertut Namminersorlutik Oqartussat qitiusumik allaffeqarfiannut sulinermikkut attuumassuteqanngitsut
• Katsorsarneqarnissamut neqeroorummik atuisinnaanermut tunngavik tassaavoq, pinngitsuuisinnaajunnaarnermik ajornartorsiuteqarneq sulisup sulineranut ima sunniuteqartigissasoq, sulisoq sulisitsisorlu isumaqarlutik, sulisup suliani naammaginartumik aallussinnaanngikkai.

Ilinniartut suliffimmillu misiliisut katsorsarneqarsinnaanermik neqeroorfigineqarsinnaapput, tamannali pissaaq ilinniarnermik ingerlatsivigisaq suleqatigalugu.

Sulisunut atornerluinermik ajornartorsiutilinnut atatillugu siunnersuutitsialaat

• Atornerluinermik ajornartorsiutitit qanoq iliuuseqarfigikkit
• Sulisoq oqaloqatigiuk
• Ikiuunniarlutit neqeroorit
• Katsorsarneqarnissamut isumaqatigiissut suliariuk
• Katsorsarneqarnissamut itigartitsinermi katsorsarneqarnissamulluunniit isumaqatigiissut naammassinngikkaanni kingunerisinnaasai sulisumut erseqqissakkit

Uippakajaarnermi

Namminersorlutik Oqartussani qitiusumik allaffissuarmi uippakajaarneq pillugu politikkeqarpoq. Sullivimmi uippakajaarneq pillugu ilisimatinneqarsimaguit uippakajaarnerluunniit pissutigalugu napparsimanernik nalunaartoqartalerpat iliuuseqarfiginissaanut aqutsisutut pisussaaffeqarputit.

Namminersorlutik Oqartussat makkuninnga iliuuseqarnikkut uippakajaarnermik pinaveersaartitsiniarput

• Uippakajaarneq pillugu ammasumik oqalliffiusinnaasumik sulliveqartitsinikkut
• Ulapaarnerup uippakajaalernerullu akornanni immikkoortitsisinnaaneq
• Aqutsisut sulisullu uippakajaarnermik pinaveersaartitseqataassapput
• Sulisut assigiinngitsut tamarmik assigiinngitsunik nukissaqarneri pillugit paasinnissinnaaneq
• Uippakajaartoqarsinnaanera pitinnagu iliuuseqarfigineqassaaq
• Uippakajaalerneq suliffiup avataanit imaluunniit suliffimmi pissutsinik pilersinneqarnersoq apeqqutaatinnagu qanoq iliuuseqarfigineqassaaq

Iliuusissatut pilersaarusiorit, uippakajaarneq pissutigalugu napparsimanermik nalunaartoqartalernera pineqarpat napparsimalluni takkuttannginnerit pillugit oqaloqatiginnigit, tamannalu pillugu annertunerusumik uani atuarsinnaavat.

Illit aqutsisutut pissutsit pillugit malitseqartitsisarnissamut sulisorlu suliffimmut atassuteqaannartinnissaa pingaaruteqarpoq, assersuutigalugu sulisoq ullup qeqqasioqatigisarlugu immikkoortortaqarfimmiluunniit ataatsimiinneranut peqataatittarlugu.