Siunnersortit pisortaannik/siunnersortaanermik toqqaaneq

Isumaqatigiissutit tullinnguuttut makku naapertorlugit siunnersortit pisortaannik toqqaasoqarsinnaavoq:

• DSA-mik isumaqatigiissut, immikkut siunnersortinik siunnersortillu pisortaat pillugit akissarsiat atorfinitsitsinermilu piumasaqaatit pillugit tapiliussaq
• Djøf-imik isumaqatigiissut, Namminersorlutik Oqartussani Kommuninilu siunnersortaanernut tapit pillugit tapiliussaq
• AK-Atorfillit pillugit isumaqatigiissut, Namminersorlutik Oqartussani Kommuninilu siunnersortaanernut akissarsiat atorfinitsinneqarnermilu piumasaqaatit pillugit tapiliussaq

Siunnersortit pisortaannik toqqaanermi piumasarineqarpoq Aningaasaqarnermut Sulisoqarnermullu Aqutsisoqarfiup sulisullu kattuffiata akornanni isumaqatigiinniarnissaq. Taamaattumik illit aqutsisutut sulisoq siunnersortit persortaattut toqqarneqarnissaanut neriorsorsinnaanngilat.

Siunnersortit pisortaannik immikkut siunnersortimik atorfeqareersumik toqqaaneq atorfiup inuttassarsiuunnissaanut pisariaqartitsinngilaq.

Siunnersortit pisortaannik toqqaanermi piumasaqaatit

Siunnersortit pisortaattut atorfinitsitsisoqassappat sulisoq sulianik qaffasissumik ilisimasaqarnissaa immikkullu ilisimasaqarnissaa piumasaqaataavoq. Isumaqatigiissut naapertorlugu siunnersortit pisortaattut toqqarneqassagaanni, sulisoq immikkut siunnersortitut ukiuni arlalinni sulisimanissaa piumasaqaataavoq. Immikkut ilisimasat aamma sulianik qaffasissumik ilisimasaqarnissaq taaneqartoq suliassaqarfimmi sulisup atorfimmini suliarisassaaniinnissaat oqaatigissallugu pingaaruteqarpoq. Sulisoq nalinginnaasumik suliassaqarfimmi sivikinnerpaamik ukiuni arfineq marlunni sulisuusimanissaa immikkullu ilisimasaqalersimanissaa, tassa siunnersortit pisortaattut toqqarneqassagaanni, piumasaqaataasoq Aningaasaqarnermut Sulisoqarnermullu Aqutsisoqarfimmit nalilerneqarpoq.

Immikkut ilisimasalerujussuunissap sulianillu ilisimasaqarluarnissap saniatigut atorfiup imarisaanut aamma immikkut ittunik piumasaqaateqartoqarpoq. Qinnuteqaat makkuninnga imaqassaaq:

• Suliassanik immikkut pitsaalluinnartunik isumaginninnerit
  • Tassunga ilanngullugu aalajangiisinnaanermut piginnaaneqassaaq
• Suliassaqarfinni tamani akuttunngitsumik ataqatigiissaarisarnerit
  • Assersuutigalugu suliniutinik aqutsinerit
• Suliassat aqutsisunut tunngasut
  • Matumani ilanngullugit siunnersuineq kiisalu aqutsisunut qutsinnerusunut suliassanut nassuiaasiorneq ineriartortitsinerlu.

Siunnersortit pisortaannut akissaasersuinerit

Immikkut siunnersorti siunnersortit pisortaattut DSA-mik isumaqatigiissut naapertorlugu toqqarneqarpat, taava siunnersortit pisortaattut taaguuteqalissaaq siunnersortit pisortaattut atorfimmut aamma siunnersortit pisortaannut tapit qaammammut 6.250,00 kr.-t ilanngunneqartarput (ukiumut 75.000,00).

Djøf-mik isumaqatigiissut naapertorlugu immikkut siunnersorti siunnersortit pisortaattut toqqarneqassappat Djøf-mik isumaqatigiissut naapertorlugu siunnersortit pisortaattut taaguuteqalissaaq aamma siunnersortit pisortaanut tapit qaammammut 6.340,67 kr.-t ilaatinneqassapput (ukiumut 76.088,00 kr.).

Immikkut siunnersorti siunnersortit pisortaattut toqqarneqarpat AK-mi atorfilinnut isumaqatigiissut naapertorlugu, Namminersorlutik Oqartussani Kommuninilu siunnersortaanernut akissarsiat atorfinitsinneqarnermilu piumasaqaatit pillugit tapiliussaq naapertorlugu siunnersortaanertut taaguuteqalissaaq siunnersortaanermullu tapit qaammammut 5.250,00 kr.-t ilaatinneqassapput (ukiumut 63.000,00 kr.-t). Siunnersortaanernut suliartoqquneqariataarsinnaanermut tapit ukiup sisamararterutaanut akunnerit 52 tikillugit qaangiuttoornernut atuupput. Aallaaviatigut isumaqatigiissummi § 16 naapertorlugu siunnersortaanermut immikkut atorfeqarnini pissutigalugu tapisisinnaanngilaq.

Inummut tapit

DSA-mik isumaqatigiissut, immikkut siunnersortit aamma siunnersortit pisortaat pillugit akissarsiat atorfinitsitsinermilu piumasaqaatit pillugit tapiliussaq, § 3, imm. 4-mi immikkut ittumik pisoqartillugu immikkut siunnersortinut inuttut tapit isumaqatiginninniutigineqarsinnaapput. Tamanna qaqutiguinnaq atorneqartarpoq tassami tamanna inuup immikkut illuinnartumik pikkorissuseqarnissaanik piginnaaneqarnissaanillu piumasaqaatitaqarmat.

Djøf-mik isumaqatigiissut, Namminersorlutik Oqartussani Kommuninilu immikkut siunnersortinut tapit pillugit tapiliussaq, § 3, imm. 2-mi immikkut ittumik pisoqartillugu immikkut siunnersortinut inuttut tapit isumaqatiginninniutigineqarsinnaapput. Tamanna qaqutiguinnaq atorneqartarpoq tassami tamanna inuup immikkut illuinnartumik pikkorissuseqarnissaanik piginnaaneqarnissaanillu piumasaqaatitaqarmat.

Immikkut siunnersortimik atorfilittaqaruit, sulisullu taassuma qulaani piumasaqaatinik naammassinnissinnaasutut nalilerneqarpat, taava innersuussutit uunga nassiutissavat www.asa.gl/sparring, tassani siunnersortit pisortaattut tapiinik tunniussinermut tunngavilersuut kakkiunneqassaaq.